Jaqynda akademık Ǵarıfolla Esimniń «Búgin» taqyrybyndaǵy semınaryna qatystym. Oıshyl qoǵamdyq sanadaǵy shamadan tys josparshyldyq úrdisin synǵa alyp, qazirgi ýaqyttyń mańyzdylyǵyna mán bermeı jatqanymyz haqynda oı tarqatty.
«Barlyq oı-ańsarymyz erteń men ótkende. Babalarymyzdyń erligi men balalarymyzdyń jarqyn bolashaǵyna ılanyp qana qoıamyz. Qazir HH ǵasyr basyndaǵy «besjyldyqtardyń» ornyn «otyzjyldyqtar» men «elýjyldyqtar» almastyryp jatqandaı. Batpaqta jatyp, baqytty armandaımyz. Biraq dál qazir batpaqtan shyǵa qoıatyn túrimiz joq. Ol úshin ony resmı túrde «josparlaý» kerek...» deıdi Ǵarıfolla Esim.
Oıdy oı qozǵaıdy. Esime Qojanasyrdyń myna oqıǵasy tústi. Qojanasyrdyń kók esegi qyrsyǵyp júrmeı qoıady. Sonda Qojekeń uzyn taıaqtyń ushyna arpa salǵan dorba ilip qoıyp, taıaqty ózi ustap otyrady. Álgi esek arpaǵa jetpek bolyp jele jóneledi. Biraq moınyn qansha sozsa da, qansha shapqylasa da jete almaıdy... Qojanasyr úıge jetken kezde ǵana esekti jemge qoıady. Ántek qana aıtylǵan ázil áńgime. Eldiń kóńiline kele qoımas. Áıtse de, shyndyq.
Hakim Abaı «Kók tuman aldymdaǵy keler zaman, úmitti sáýle etip kóz kóp qadalǵan» dep tolǵanady.
Ras, armansyz, úmitsiz qoǵamnyń túbi – qurdym. Biraq búgingi kúnniń bıiginen ne kórip turmyz?
«Alpamys, Qobylandy batyrlar bizge qazir kerek» dep aıaqtady sózin pálsapashy...