Astana men Almaty qalasyndaǵy «Mıras» halyqaralyq mektepterinde NNEF Qoǵamdyq qory uıymdastyrǵan jyl saıynǵy Teacher of the year («Jyldyń úzdik pedagogy») konkýrsynyń qorytyndysy shyqty, dep habarlaıdy Egemen.kz.
Osy qurmetti ataq úshin tórt «Mıras» mektebi men bes balabaqshanyń pedagogteri baq synady. NNEF qory úshin Teacher of the Year konkýrsy – mektepter men balabaqshalarda kadrlyq rezervti qalyptastyrý tetikteriniń biri.
«Bul konkýrs pedagogtyń ózindik is-tájirıbesin pedagogıkalyq qoǵamdastyqqa jarııa etýge múmkindik beredi. Eń bastysy, bizdiń árqaısymyz jumysta qosymsha tájirıbe jınaqtadyq jáne óz is-tájirıbemizdi tujyrymdadyq. Qazirgi ýaqytta biz, muǵalimder, «NNEF» QQ basshylyǵy tarapynan erekshe qoldaýdy sezinemiz. ( ... ) Muǵalimder boıynda óskeleń urpaqty oqytý men tárbıeleý mindeti úshin jan-tánimen berile jumys isteýge degen tabıǵı tilek-nıeti týyndaıdy», dedi Teacher of the Year 2021-2022 konkýrsynyń jeńimpazy Almıra Aıýpova.
Uıymdastyrýshylardyń aıtýynsha, konkýrs oǵan qatysýshylarǵa óziniń kásibı sheberligi pen shyǵarmashylyq tásilderin kórsetýge kómektesedi, sonymen qatar odan ári mansaptyq ósý men damýǵa da yqpal etedi.
«Osy konkýrstyń ádil qazylar alqasynyń músheleri retinde qatysýshylardyń jumysyn baǵalaýda biz pedagogterdiń kásibı quzyretteri men daǵdylaryn ǵana emes, olardyń ınnovasııaǵa, shyǵarmashylyqqa qabilettiligin, sondaı-aq olardyń balalarǵa bilim berý men tárbıeleýdi damytýǵa qosqan úlesin de eskerdik. Usynylǵan ádister men tásilderdiń ózindik ereksheligi men tıimdiligi de mańyzdy krıterııler boldy. Konkýrs nátıjeleri óte áserli boldy. Biz kóptegen tamasha jumystardy kórdik», dedi «Mıras» bóbekjaı-baqshasynyń ádiskeri Marına Úmbetalıeva.
Konkýrstyq baǵdarlamanyń úsh jylynda oǵan tórt júzden astam pedagog qatysty. О́tken jyldardaǵy konkýrs jeńimpazdary men fınalısteri qazir óz mektepteri men balabaqshalarynda joǵary ákimshilik qyzmetter atqarýda. Olardyń qatarynda Almaty qalasyndaǵy «Mıras» mektebinde dırektordyń tárbıe isi jónindegi orynbasary Gaýhar Ilasheva, «Arystan» mamandandyrylǵan lıseıiniń ádiskeri Lázzat Denebaeva, Almaty qalasyndaǵy «Mıras» bóbekjaı-baqshasynyń ádiskeri Altynaı Pirimbetova, Atyraý qalasyndaǵy «Mıras» bóbekjaı-baqshasynyń ádiskeri Toıǵan Jarbosynova jáne taǵy basqalar bar.
«Konkýrstaǵy jeńisim meniń basqa kásibı is-sharalar men baıqaýlarǵa qatysýǵa degen yntamdy arttyrǵanyn erekshe atap ótkim keledi. Bul tájirıbe meni jáne oqýshylarymdy jańa jetistikterge shabyttandyrdy. Eń mańyzdy nátıjelerdiń biri – meniń oqýshymnyń sý týraly respýblıkalyq jobalar baıqaýyndaǵy jeńisi boldy. Osy jobamen jumys isteı otyryp, biz ekologııa jáne turaqty damý salasyndaǵy bilimimizdi tereńdetip qana qoımaı, óńirimizdiń sý resýrstaryn jaqsartý boıynsha naqty usynystar ázirleı aldyq», dedi Almatydaǵy «Mıras» mektebiniń geografııa jáne bıologııa pániniń muǵalimi Gaýhar Shaımerdenova.
Ol bul jobany shákirtterimen birge Stokgolmdegi halyqaralyq konkýrsta usyndy. Konkýrsqa barý men kásibı qarym-qatynas jasaý túrli elderdegi áriptestermen baılanys ornatýǵa jáne odan ári damýǵa jol ashty.
«Bul tájirıbe men úshin de, oqýshylarym úshin de baǵa jetpes dúnıe boldy. Biz jańa bilim men daǵdylardy ıgerýmen qosa, ózge elderdegi áriptestermen jáne mamandarmen baılanys ornattyq, bul bizge tájirıbe almasýǵa jáne úzdik tájirıbelerdi qabyldaýǵa múmkindik berdi», dep atap ótti Gaýhar Shaımerdenova.
Jyldar boıy Teacher of the year konkýrsy fınalıster úshin bedel men kásibı sheberlik sapasynyń belgisine aınaldy. Jyl saıyn jeńimpazdarǵa 500 myń teńge beriledi, biraq olar úshin basty marapat, árıne, aqshalaı kótermeleý emes, jańa bıikterge bastaıtyn pedagogıkalyq saladaǵy bolashaq damý ekeni sózsiz.