«Qazaqstannyń Damý Banki» AQ («Báıterek» holdınginiń enshiles qurylymy, budan ári – Bank, QDB) Koreıanyń eksporttyq-ımporttyq bankimen jáne K-Sure Koreıa saýda-saqtandyrý korporasııasymen ózara túsinistik týraly memorandýmdar jasasty. Qujattarǵa qol qoıý Koreıa Respýblıkasynyń Prezıdenti Iýn Sok Ioldiń Qazaqstanǵa memlekettik sapary barysynda ótkizilgen Qazaqstan-Koreıa bıznes-forýmy aıasynda ótti, dep habarlaıdy Egemen.kz «Qazaqstannyń Damý Banki» AQ Qoǵammen baılanys qyzmetine silteme jasap.
Memorandýmdarǵa QDB Basqarma tóraǵasy Marat Elibaev, Koreıanyń eksporttyq-ımporttyq bankiniń basshysy Hı-Sýn Iýn jáne Koreıanyń K-Sure Koreıa saýda-saqtandyrý korporasııasynyń basshysy Ionjın Chan qol qoıdy.
«Bul qujattar strategııalyq mańyzdy jobalardy damytýǵa jáne eki el arasyndaǵy ekonomıkalyq baılanystardy nyǵaıtýǵa yqpal ete otyryp, Qazaqstan men Ońtústik Koreıa arasyndaǵy iskerlik yntymaqtastyq úshin jańa múmkindikter ashady. Qazaqstannyń Damý Banki bul múmkindikterdi ınnovasııalyq bastamalardy iske asyrý jáne Qazaqstannyń ınvestısııalyq tartymdylyǵyn arttyrý úshin paıdalanýǵa umtylady. Biz Koreıanyń eksporttyq-ımporttyq bankimen jáne K-Sure-men áriptestigimiz turaqty ekonomıkalyq ósýge jáne ekonomıkanyń basym sektorlarynyń ózara tıimdi damýyna yqpal ete otyryp, eki el úshin de eleýli paıda ákeletinine senimdimiz», dep atap ótti QDB basshysy Marat Elibaev.
Koreıanyń eksporttyq-ımporttyq bankimen qol qoıylǵan qujat energetıka, munaı hımııasy, óńdeý ónerkásibi, ınfraqurylym jáne kólik, ekologııa jáne qorshaǵan orta, balamaly energetıka, metallýrgııa jáne taý-ken ónerkásibi men ekonomıkanyń basqa da sektorlaryndaǵy strategııalyq mańyzdy jobalardy qarjylandyrýǵa baǵyttalatyn 50 mln AQSh dollaryna deıingi somaǵa bankaralyq kredıt jelisin ashýdy kózdeıdi.
K-Sure-men ózara túsinistik týraly memorandým óndiristi damytýdyń negizgi salalarynda Qazaqstan men Ońtústik Koreıanyń qarjy ınstıtýttary arasyndaǵy mámilelerdi saqtandyrý boıynsha yntymaqtastyqty nyǵaıtýǵa baǵyttalady.
Budan basqa, qujat aǵymdaǵy jáne áleýetti jobalar men iskerlik múmkindikter týraly aqparatpen almasýdy, qazaqstandyq jáne koreıalyq kompanııalardyń yntymaqtastyǵy jónindegi bastamalardy qoldaýdy, olardyń arasyndaǵy baılanystardy damytýdy, eksport jáne ımport úshin saqtandyrý quraldaryn usynýdy, sondaı-aq tájirıbe almasýdy kózdeıdi.
Qyrmyzy JUMAǴALIQYZY,
EUÝ stýdenti