Astanada Qazaqstan jáne Koreıa Respýblıkasynyń memlekettik organdary, iri kompanııalarynyń qatysýymen bıznes-forým ótti, dep habarlaıdy Egemen.kz.
Is-shara Koreıa Respýblıkasynyń Prezıdenti Iýn Sok Ioldiń Qazaqstanǵa alǵashqy memlekettik sapary aıasynda uıymdastyryldy.
Forýmda Memleket basshysy Qasym-Jomart Toqaev bıznes ókilderine rızalyǵyn bildirip, eki el arasyndaǵy saýda-ekonomıkalyq yntymaqtastyqtyń mańyzyn atap ótti. Búginde Koreıadan ekonomıkamyzǵa tikeleı tartylatyn ınvestısııa kólemi on mıllıard dollarǵa jýyqtasa, ózara saýda aınalymy alty mıllıard dollarǵa jetken. Qazirdiń ózinde Qazaqstan naryǵynda Ońtústik Koreıanyń 700-den astam kompanııasy jumys isteıdi. Olardyń qatarynda Hyundai, KIA, Samsung, LG, Doosan sekildi jahandyq korporasııalar bar. Bul rette elimiz Ońtústik Koreıa Respýblıkasynyń Ortalyq Azııa aımaǵyndaǵy negizgi saýda-ekonomıkalyq seriktesi retinde pozısııasyn nyǵaıtýǵa nıetti.
Bıznes-forým kelissóz alańyna aınalyp, túrli sala ókilderin bir arnaǵa toǵystyrdy. Nátıjesinde bıznes pen memlekettik qurylym arasynda ekijaqty ekonomıkalyq baılanysty kúsheıtýge baǵyttalǵan birqatar kommersııalyq qujatqa qol qoıyldy.
Jıynda «Qazaqstannyń eksporttyq-kredıttik agenttigi» AQ men Koreıanyń KSURE saýda saqtandyrý korporasııasy arasynda yntymaqtastyqty kózdeıtin Memorandým bekitildi. Keıin Qazaqstannyń eksporttyq-kredıttik agenttigi alańynda KSURE basshylyǵyme narnaıy kezdesý ótti, oǵan «Báıterek» Ulttyq basqarýshy holdıngi de qatysty.
Koreılik saqtandyrý korporasııasynyń basshysy Iаng Djın Chjan yntymaqtastyq kelisimi sheńberinde birqatar usynysyn aıtty. Máselen, jylyna keminde bir ret agenttik sarapshylarynyń kezdesýin ótkizý týraly bastama kóterdi. Birinshi kezeńde bul kezdesýler qoldanystaǵy qoldaý quraldary aıasynda saqtandyrý erejelerin almasýdy kózdese, odan ári eksporttyq qaýip-qaterdi seıiltý maqsatyndaǵy jobalar kezek kútedi.
Qazaqstannyń eksporttyq-kredıttik agenttigi Basqarma tóraǵasy Aslan Kalıgazın memorandým eki tarap arasyndaǵy yntymaqtastyq sınergııasyn kúsheıtý úshin negiz bolady dep senim bildirdi.
«Búgingi kezdesýdiń maqsaty – qos agenttikti tabysqa jeteleıtin yntymaqtastyqtyń berik negizin qalaý. Biz Qazaqstanda eksportqa baǵdarlanǵan jobalardy damytýdyń katalızatory bolýdy kózdeımiz. Koreılik áriptesterimizben ózara saýdany damytý jáne eksporttyq saqtandyrý salasynda ozyq tájirıbeni almasý úshin óz mandattarymyz sheńberinde kúsh-jigerimizdi biriktiremiz», dep atap ótti A. Kalıgazın.
Ońtústik Koreıa basshylyǵy Qazaqstanǵa is-sapary aıasynda Ortalyq Azııa elderi arasyndaǵy yntymaqtastyqtyń jańa bastamasyn usyndy. Bastamaǵa «K-Silk Road» degen ataý berildi. Onyń aıasynda strategııalyq mańyzdy resýrstardy óndirý jáne qaıta óńdeý, atom elektr stansııasyn salý, sondaı-aq jel jáne kún energetıkasyn damytý máseleleri qamtylady. Eki eldiń eksporttyq-kredıttik agenttikteri arasyndaǵy kelisim «K-Silk Road» maqsatyna sáıkes keledi. «Qazaqstannyń eksporttyq-kredıttik agenttigi» AQ Halyqaralyq yntymaqtastyq departamenti dırektory Armana Bekbasova álemdik jetekshi eksporttyq-kredıttik agenttikter qazir qoldaý quraldaryn kúsheıtip jatqanyn aıtty. Bul ımporttyń basym baǵyttary boıynsha balamaly jetkizý tizbegin qurýǵa múmkindik berse, ónerkásip kásiporyndary qajetti resýrstarmen qamtamasyz etiledi.
Akkýmýlıator úlgisindegi nıkel jáne basqa da metall óńdeý ónimderin birlesip ázirleý, óndirý jáne eksporttaý Qazaqstanǵa tabysty áser etedi. Atap aıtqanda, turaqty damý qaǵıdattaryn saqtaı otyryp, Ońtústik Koreıa ınvestısııalaryn, tehnologııalary men jabdyqtaryn tarta otyryp, osy ken oryndaryn ıgerý elimizge daıyn ónimniń álemdik naryǵynda kóshbasshy bolýǵa múmkindik beredi.