Qazaq ulttyq agrarlyq zertteý ýnıversıtetinde kórnekti memleket jáne qoǵam qaıratkeri, ǵalym-ustaz Narıman Qypshaqbaıulynyń 90 jasqa tolý qurmetine oraı oqý orny stýdentteriniń qatysýymen «Qalaı kásibı gıdrotehnık bolýǵa bolady?» degen taqyrypta dóńgelek ústel ótti.
Dóńgelek ústeldi júrgizgen KazNARU basqarma tóraǵasy-rektor, Ulttyq ǵylym akademııasynyń prezıdenti Aqylbek Kúrishbaev respýblıkadaǵy sý qoryn saqtaýdyń mańyzdylyǵyn atap óte kelip, «Sý resýrstary jáne sýdy paıdalaný» kafedrasynda uzaq jyldar abyroıly eńbek etken ǵalym-ustazdyń sý sharýashylyǵy salasyn damytýdaǵy eren eńbegine toqtaldy. Mereıtoıymen quttyqtap, syı-sııapat kórsetti.
«Narıman Qypshaqbaıulynyń Qazaqstannyń sý sharýashylyǵyn damytýǵa qosqan zor úlesin zor yqylaspen aıtyp júremiz. О́ıtkeni qaıratker eńbek jolyn qarapaıym maman bolyp bastap, Melıorasııa jáne sý sharýashylyǵy mınıstrliginiń basshylyǵyna deıingi nátıjeli jumystary áli kúnge deıin aýyl sharýashylyǵynyń damýyna paıdasyn tıgizip jatyr. Táýelsizdik jyldarynda Sý kodeksiniń jobasyn ázirleýge jetekshilik etip, Ortalyq Azııa memleketteri, Reseı jáne Qytaı arasyndaǵy transshekaralyq ózenderdiń sýyn paıdalaný jónindegi halyqaralyq uıymdy qurýǵa úlken úles qosty. Sonymen qatar, Halyqaralyq Araldy qutqarý qoryn qurýǵa belsendilikpen atsalysyp, sý qaýipsizdigin saqtaý, sý nysandaryn qorǵaý máselelerinde barlyq áriptesterine úlgi kórsetip keledi. Toqsannyń tórine shyqqan Narıman Qypshaqbaıulyna barsha ǵalym áriptesteriniń atynan zor densaýlyq, qajyrly kúsh-qaırat tileımiz!» dedi rektor óz sózinde.
«Jer men sý – Qazaqstannyń eń úlken baılyǵy. Sondyqtan, tabıǵat baılyǵyn kózdiń qarashyǵyndaı saqtaýǵa tıispiz. Meniń sý salasynyń ınjenerligin tańdaýym da jaıdan-jaı emes. Halqymyz jaqsy ómir súrýin qamtamasyz ete otyryp, osy tabıǵattyń bergen syıyn resýrsqa tıimdi aınaldyra otyryp, kózdiń qarashyǵyndaı saqtaýǵa mindetti ekenimizdi este ustaýymyz qajet» dep atap ótti Narıman Qypshaqbaıuly.
Eńbek jolyn Taý Túrgen basseıninde qatardaǵy gıdrotehnık bolyp bastap, respýblıkadaǵy eldi mekenderdi aýyz sýmen qamtıtyn memlekettik deńgeıdegi jobalarǵa jetekshilik etken Narıman Qypshaqbaıuly osy salada mınıstr dárejesine deıin kóterilip, abyroı bıiginen kórindi. Uzaq jyldardaǵy eńbegi úshin «Qurmet» jáne II dárejeli «Barys», «Otan» ordenderimen, kóptegen úkimettik medaldarmen marapattaldy.
Dóńgelek ústel barysynda «Water HUB» halyqaralyq zertteý ortalyǵynyń dırektory A.Rıabsev, Geografııa ınstıtýtynyń dırektory A.Medeý, Ahmetsafın atyndaǵy Gıdrogeologııa ınstıtýtynyń dırektory M.Absametov, Halyqaralyq Araldy qutqarý qorynyń Qazaqstandaǵy Atqarýshy dıreksııasynyń dırektory S.Muqataev, Qonaev atyndaǵy ÚAK fılıalynyń dırektory M. Arystanov, «Kazgıprovodhoz» PK dırektory R.Faızýldın jáne taǵy da basqa ǵalymdar, mamandar ardager ǵalymdy mereıtoıymen quttyqtap, elimizdegi sý salasynda týyndap otyrǵan ózekti máselelerdi, olardy sheshý joldaryn talqylady.
ALMATY