Senattyń Áleýmettik-mádenı damý jáne ǵylym komıtetiniń depýtattary «Farmasevtıka salasynyń jaǵdaıy men damý perspektıvalary» atty dóńgelek ústel ótkizdi, dep habarlaıdy Egemen.kz joǵarǵy Palatanyń baspasóz qyzmetine silteme jasap.
Jıynǵa qatysýshylar halyqty qaýipsiz, tıimdi jáne sapaly dárilik zattarmen, medısınalyq maqsattaǵy buıymdarmen qamtamasyz etý máselelerin, sondaı-aq otandyq farmasevtıka salasynyń qazirgi jaǵdaıy men damý keleshegin talqylady.
Komıtet tóraǵasy Nurtóre Júsip Memleket basshysy otandyq farmasevtıka ónerkásibiniń áleýetin damytýǵa basa nazar aýdaryp otyrǵanyn jáne dári-dármek naryǵyndaǵy otandyq óndiristiń úlesin 2025 jylǵa qaraı 50%-ǵa deıin arttyrýdy tapsyrǵanyn atap ótti.
«Búginde farmasevtıka ekonomıkanyń qarqyndy damyp kele jatqan sektoryna jatady. Qazaqstannyń farmasevtıkalyq naryǵynda 80-nen astam otandyq óndirýshi jumys isteıdi, olardyń jartysynan azy dárilik zattardy óndiredi. Otandyq kásipkerler 900-ge jýyq túrli dárilik zattardy jáne myńnan astam medısınalyq buıymdardy shyǵarady. Alaıda, problemalar az emes, olardyń biri – otandyq dárilik zattar men medısınalyq maqsattaǵy buıymdar óndirisin damytý», dep atap ótti Nurtóre Júsip.
Densaýlyq saqtaý mınıstriniń orynbasary Jandos Búrkitbaev dárilik zattar men medısınalyq buıymdar ómiriniń barlyq kezeńi qamtylatyn farmasevtıka salasyn memlekettik retteý týraly senatorlarǵa aıtyp berdi. Ol tizbekte ázirleý, klınıkaǵa deıingi jáne klınıkalyq zertteýler, tirkeý, óndiris, qaýipsizdikti baǵalaý men ónimdi qoldaný jáne joıý qamtylady. Farmasevtıkalyq ónimderdiń sapasyn baqylaý osy prosestiń mańyzdy quramdas bóligi bolyp tabylady. Ol dárilik zattardy tirkeý, partııalar men serııalardyń sapasyn baǵalaý kezeńderinde, sondaı-aq farmakologııalyq qadaǵalaý jáne farmasevtıkalyq ınspeksııa júıesi arqyly júzege asyrylady.
«SK-Farmasııa» JShS ókili óz kezeginde sońǵy jyldary halyqtyń naýqastanýy kóbeıip kele jatqanyn jetkizdi. Syrqattar arasynda tynys alý organdarynyń aýrýlary kóbirek - 27%, qan aınalymy júıesi - 17%, nesep - jynys júıesi - 8%, as qorytý júıesi - 8% jáne júktiliktiń asqynýy - 5% bolyp otyr.