Jetisýlyq sharýalarǵa 148,3 mln tekshe metr sý berildi. Bul týraly О́ńirlik kommýnıkasııalar qyzmeti alańynda Jetisý oblysy boıynsha «Qazsýshar» fılıalynyń dırektory Saıat Qudaıbergenov málimdedi, dep habarlaıdy Egemen.kz.
Búginde 26 myń gektardan astam egis alqaby sýaryldy. Sharýalarmen barlyǵy 770,3 mln tekshe metr sýarmaly sý berý jóninde 6140 kelisimshart jasalǵan.
Sondaı-aq jalpy uzyndyǵy 106,2 shaqyrym bolatyn kanal bóligi mehanıkalyq ádispen tazalanyp, 13 gıdrotehnıkalyq qurylys pen 9 gıdrobeket jóndelip otyr.
Saıat Qudaıbergenovtiń aıtýynsha oblysta jańa sý sharýashylyǵy nysandaryn salý josparǵa alynǵan. Bular – Eskeldi aýdanyndaǵy Balyqty ózenindegi sý qoımasy, Panfılov aýdanyndaǵy Qorǵas, Úsek jáne Tyshqan ózenderindegi úsh sý qoımasy, Alakól aýdanyndaǵy Jamanty sý qoımasy, Kóksý aýdanyndaǵy Byjy ózenindegi sý qoımasy. Qazirgi ýaqytta tehnıkalyq-ekonomıkalyq negizdeme ázirlenip jatyr.