Qala irgesindegi Shaǵalaly aýlynda áldebir sharýamyz bolyp at basyn burǵanbyz. Taspadaı tartylǵan tas joldyń qos qaptalyna qonystanǵan, etek-jeńi keń pishilgen aýyl. Erterekte ózge ult ókilderi kóp bolatyn. Keıingi jyldary taý asyp, tas basyp kelgen aǵaıyn qonystana bastady. Aǵaıynmen birge bizdiń ólke baıaǵyda umytqan baǵzy yrym, jol-joralǵy qaıta oralǵandaı.
Aýyl irgesine taıap kelgenimizde bir top balanyń arqasyna áldene baılanǵan tóbetti qýyp júrgenin kórdik. Jaıaý balaǵa júırik ıt jetkizýshi me edi. О́zderiniń de ıtti qýa-qýa ábden sharshaǵandary kórinip tur. Buryn kóz ushynan kóringen dúnıeni jazbaı tanıtyn janardyń oty kemigen saıyn quryqsalym jerdegi qarasyndy ázer ajyratatyn jazǵan basymyz ury ıt kózden tasa qalǵan qozy-laqty ońaı olja kórip jáýkemdep qashqan shyǵar dep oılaǵanbyz. Shetin kórinistiń jaı-japsaryn bileıik dep at basyn iriktik. Qýǵynshy balalar aldyrtqan albyrt keıipte emes, júzderinde áldebir qýanyshtyń lebi alaýlaıdy.
– Asan, arǵy jaǵynan qaýmala, – dep aıǵaılaıdy bireýi. Endi bireýi kókshýlan tóbetti aldaýsyratyp shaqyryp álek.
Jol shetindegi úıdiń irgesinde aq jaýlyqty ájeı tur eken. Úlken kisige toqtap sálem berdik. It qýǵan balalardyń jaıyn surastyq.
– Itkóılek qoı, – dedi ájeı, – bilýshi me edińder? Kóne yrym.
Biz tis jara qoımaǵan soń, áńgimeniń tigisin ózi jazdy.
– Baǵzy zamanda kishkentaı balaǵa jel-quz tıip aýyra qalsa, boıyndaǵy derti ıtke kóshsin dep kishkentaı dorbaǵa qant-kámpıt, qurt salyp, ıttiń moınyna baılap, qashyrtqan. Bir ǵajaby, jeńil-jelpi syrqattanǵan kóp bala osy bir kóne yrymnan keıin qulan-taza jazylyp ketetin bolǵan. Bul kúni umyttyq qoı. Búgin de sol kóne dástúrdi jańǵyrtyp jatyr edik.
Ata-ananyń bar nıeti balanyń ústinde ǵoı. Atam qazaqtyń adal yrymynyń sebi shynynda da tıetin shyǵar.