Tabıǵaty tamyljyǵan Bulandy baýraıynda týǵan ólkeniń ajaryna jaýapkershilikpen qaraıtyn zamandastarymyz az emes eken. Olar baǵaly bastamany qoldap, óz úlesterin qosyp jatyr.
Kórikti ólkede keıingige úlken ónege, ómiri, halqyna etken qyzmeti ádemi mysal bolatyn tulǵalardyń izi saırap jatyr. Aksııa barysynda 14 tarıhı-mádenı eskertkishtiń mańaıy tap-tuınaqtaı tazalanyp, sáýirdiń aq jaýynymen jýylǵandaı jarqyraı jadyrap, sáýlettenip qaldy. It tumsyǵy ótpeıtin orman-toǵaıy mol óńirdiń óńin keltiretin úsh myńnan astam ártúrli aǵash kósheti otyrǵyzyldy. Bul bir adamnyń qolynan keletin sharýa emes, kóp bolyp jumylyp, jaqsy istiń tóńireginde toptasa bilgen tirliktiń arqasynda ońynan ońǵarylǵan sharýa boldy.
Ortaq iske aýdan basshylarynan bastap jastar men eriktiler, tutas eńbek ujymdary, tabıǵat janashyrlary belsene qatysty. 1 500 adam jumylǵannan keıin aldaryndaǵy jumys úrkip turmaı ma? Aldymen Makınsk qalasynyń shetki aımaqtary turmystyq qaldyqtardan tazartyldy. Orman alqaptary, avtomobıl jolynyń qos qaptaly tazalanyp, kórer kózge jutynyp shyǵa keldi. Bes tonnadan astam qoqys polıgonǵa tasymaldandy.
– Memleket basshysy Qasym-Jomart Toqaevtyń bastamasymen qolǵa alynǵan aksııa bizdiń bulandylyqtardy biriktirip, qýatty serpin berdi, – dep atap ótti aýdandyq máslıhattyń depýtaty Álisher Kenjeǵalıev. – Meniń oıymsha, osy sharýanyń eki jaǵy bar. Birinshiden, ózimiz turyp jatqan aımaqtyń ajary kirse, ekinshiden, ókshemizdi basyp kele jatqan keıingi jastar ónegeli isten tálim-tárbıe alatyn bolady. Búgin bajaılap qarasaq, kúre joldyń boıynda keleńsiz kórinis oryn alǵan eken. О́kpek jolaýshylardyń nemkettiligi. Jol boıyn támam jurttyń tazalap júrgenin kórgen soń olar da endigi arada bosaǵan bótelkeni, temekiniń tuqylyn tastap, tabıǵatqa qııanat jasamaıtyn bolady. Jalpy, mádenıettilikke tárbıeleıtin is dep bilemin.
Syńsyǵan ný ormannyń ishi de tazalyqty tileıdi eken. «Bardy baǵalaı bileıik» degen ekobelsendiler máńgi jasyl qaraǵaılar qaýlaı ósken orman ishin muntazdaı etip tazalap shyqty.
– «Tazalyq – densaýlyq kepili» degen sózdiń úlken máni bar, – deıdi aýdandyq aqsaqaldar keńesiniń tóraǵasy Shahman Qusaıynov. – El aǵalary egde tartqan jasyna qaramaı týǵan jerdiń kórkin keltireıik dep qolushyn berip jatyr. Úlkenderdiń ózi ımandy sharýaǵa bel býyp kiriskennen keıin jastar da belsene kirisip jatyr. Osy is naýqandyq sharýaǵa aınalmaı, turaqty túrde júzege asyp otyrýy kerek.
Dál qazir qarasań, Bulandy baýraıynan uqypty qoldyń taby anyq baıqalady. Basshy bastap, jalpaq el qostap júzege asyryp jatqan aýqymdy istiń bir parasy eljandy, jer besigin súıe biletin parasatty bola bilýge meńzep turǵandaı.
Aqmola oblysy,
Bulandy aýdany