Qurban aıttyń alǵashqy kúni Oral qalasyndaǵy «El yrysy» bazarynda gaz ballony jarylyp, 10 adam zardap shekti. Jarylys qurbandyqqa soıylǵan maldyń bas-sıraǵyn úıtý úshin paıdalanylǵan gaz ballonynan shyqqan.
Oqys oqıǵa týraly habar jedel járdem operatoryna 16 maýsym kúni tańerteńgi saǵat 09.49-da túsken eken. Dárigerlerden quralǵan 5 brıgada oqıǵa ornyna 5 mınýttyń ishinde jetip úlgergen.
«Zardap shekkender – barlyǵy 10 adam, olardyń 2-eýi – kámeletke tolmaǵan er bala, eresekterdiń jas shamasy 27–67 aralyǵynda» dep habarlady Batys Qazaqstan oblystyq densaýlyq saqtaý basqarmasynyń baspasóz qyzmeti.
Bir táýlikten keıingi jaǵdaı mynadaı: qazirgi ýaqytta 3 eresek adam reanımasııada, 4-eýi polıtravma bólimshesinde jáne eki jasóspirim kópbeıindi oblystyq balalar aýrýhanasynda qajetti em alyp jatyr. Jasóspirimniń bireýi – jansaqtaý bóliminde, bireýi polıtravma bólimshesinde eken.
Naýqastardyń halin densaýlyq saqtaý basqarmasynyń basshysy Madııar О́teshev, basshynyń orynbasary Gúlnár Ábdirahmanova, DSB bas shtattan tys travmatologi Serik Qarekenov jáne qalalyq kópbeıindi aýrýhana dırektory Arman Myrzahmetov arnaıy baryp kórdi. Tıisti mamandardyń qatysýymen konsılıým ótkizilgen. Sondaı-aq Astana jáne Almaty qalalarynyń Apattar medısınasy ortalyǵy reanımatologterimen jáne kombýstıologterimen birlesip telemedısına júrgizilgen. Qazir kelisilgen emdeý taktıkasymen em-shara júrgizilip jatyr eken.
Batys Qazaqstan oblysynda keıingi kúnderi kún raıy óte ystyq, 40 gradýsqa jaqyndap tur. Tótenshe jaǵdaılar departamenti joǵary órt qaýpi qaterin kún saıyn habarlaıdy. Úsh kúnge sozylatyn qurban aıt kezinde qaýipsizdikti saqtaý týraly QMDB-nyń Batys Qazaqstan oblysyndaǵy ókil ımamy Samat Álibaev ta úndeý jasady. Qazir halyq kóp jınalatyn qoǵamdyq oryndarda, qurban aıtqa shalynyp jatqan qasaphanalarda qaýipsizdik sharalary kúsheıtildi.
Batys Qazaqstan oblysy