Aýyldyń baskóterer azamattary birigip, ıeleri kóship ketken soń bosap qalǵan, jýan qaraǵaıdan qıyp salǵan, eńseli, tórt bólmeli úıdi satyp alyp, meshitke yńǵaılap qaıta jabdyqtaǵan eken. Atshaptyrym jerden menmundalap turatyn munarasyn da ornatypty. Mańaıy tap-taza, ádemilep qorshalǵan. Nesi bar, ımandy sharýa. Meshit máselesi sheshilgenimen, ıe bolatyn adam kerek. Ondaı kisi shyǵa qoımaǵan soń aýdan ortalyǵynan dinı saýatty, bilimdi jas jigitti at-túıedeı qalap, shaqyrtyp alypty.
Qurban aıtta aýylǵa bardyq. Zırat basynda jańaǵy jas molda júr eken. О́tinish aıtqan jamaǵattyń sózin jerde qaldyrmaı, quran baǵyshtap júr. Ata kórshi Jánibek qurban shalǵan eken, «at basyn bura ket, dám tatasyń» dep shaqyrdy. Bardyq. Erterekte aýyldyń aqsaqal, qarasaqaly tórt-bes tabaq bolatyn, qazir alpysty alqymdap qalǵandar eki-aq tabaq qana. Eń úlkeni Esenbaı aqsaqal. Áńgimeniń álibi – Qurban aıty.
Bir kezde elge ıelik etip otyrǵan Esenbaı aqsaqal molda bala Murattyń kún kórisi týraly áńgime sabaqtady. Jalaqy almaǵannan keıin bóten aýylda turyp, baýyr basyp ketýi de qıyn ekendigi aıtyldy.
– Qazaq balasy negizi baýyrmal, qaıyrymdy halyq qoı, – dedi Esenbaı aqsaqal shoqsha saqalyn taramdap, sıpalaı otyryp, – men bir sıyrymdy beremin, súti bulaqtaı. Saýyp ish. Burynǵylar mundaı kómekti shúlen taratý dese kerek, qazir umytylǵan dástúr. Baıaǵynyń baılary tóńiregindegi joq-jitikke saýyn sıyr, attyń maıyn bergen. Keńes zamanynyń kesir saıasaty baı men baǵlandy qubyjyq etip kórsetti ǵoı, áıtpese olar da el ishindegi berekeni oılamady deısiz be? Biz búgin ortamyzǵa kelip otyrǵan osy azamatty qamqorlyǵymyzǵa alsaq, eldigimizdiń belgisi emes pe?
Aqsaqaldyń oń sózin dastarqan basyndaǵy jurt qostaı jóneldi. Bireý saýlyq, bireý toqty atady. Qurdastary jylqyly baı dep ájýalaıtyn Qanatbek aǵa sútin saýyp ishýge bıe beretin boldy. Áp sátte Murat moldanyń qańyrap turǵan qorasy tórt túlikke toldy da qaldy.
Dám qaıyrǵan soń jolǵa shyqtyq. Jol boıy halyqtyń yqylasyna kóńilimiz tolyp, tánti bolyp bara jatyr edik. Shúlen taratý degendi buryn da estigenmin. Áldebir orynsyz myrzalyq, ysyrapqa aıtylatyn sóz shyǵar dep oılaýshy edim. Sóıtsem, astyndaǵy jalǵyz atyn jolaýshyǵa túsip beretin márt qazaqtyń tabıǵatyn kórsetetin taǵylymdy sóz, tamasha josyq eken ǵoı. Aýyldyń osy bir ańqyldaǵan peıilinen aınalaıyn dep kúbirledim ishteı.