Asýdyń UFC-degi úshinshi jeńisi

Jambyl oblysynyń týmasy Asý Alma­baevtyń osy sport túrin serik etkeli 11 jyl­dan asty. Asa jeńil sal­maqta synǵa túsip júrgen 30 jas­taǵy saqa sportshy sol kezden beri 21 márte aıqas ala­ńyna shyǵyp, 19 ret jeńiske jetti. 12 qarsylasyn aıqyn ba­symdyqpen utty. Asý úshin tek 2017 jyl sátsiz boldy. Sol kezde qazaq faıteri Mahachkalada da­ǵystandyq Tagır Ulanbekov pen Almatyda ázerbaıjandyq Meh­mad Mámedovke ese jiberdi. Esesine sodan keıingi jyldary ol jeńilistiń kermek dámin tatqan emes. Byltyr Almabaev UFC-men kelisimshartqa otyrdy. 5 tamyzda qandasymyz ıamaıkalyq Odı Osborndy qyl­qyndyryp tastasa, bıyl 9 naý­ryzda amerıkalyq Sı-Djeı Veıgarany upaı sanymen utty.

Álemniń eń úzdik promo­ý­she­nindegi úshinshi jekpe-jegin Asý AQSh sportshysy Hose Djon­sonǵa qarsy ótkizdi. Onyń sher­dogi – 24 jekpe-jek, 16 jeńis, 8 je­ńilis. Bul báseke bary­synda qos faıterdiń de aıqyn jeńiske jetýine múmkindigi boldy. Biraq qolaıly jaǵdaıdy ekeýi de utym­dy paıdalana al­mady. De­sek te úsh raýndta da qa­zaqtyń ba­symdyǵy anyq baı­qaldy. Tip­ten sońǵy sekýndtardy bizdiń jigit Djonsondy qylqyndyryp tas­taýǵa shaq qaldy. Alaıda bel­gilengen ýaqyt jetpedi. Aıqas aıaq­talǵannan soń, barlyq tóreshi Asý Almabaevtyń myq­tylyǵyn biraýyzdan moıyndady.

Al Saıran Nurdanbektiń (20-9, 14 KO) bul joly da joly bol­mady. Ol úshinshi raýndta bra­zılııalyq Mılkýızael Kosta­nyń (20-6, 13 KO ) «qyl­qyndyrý» ádisine túsip qaldy. Sóıtip, Qy­taıda týyp-ósken 30 jastaǵy qandasymyz UFC-de qatarynan ekinshi ret jeńilis tapty.