PAVLODAR. 26 sáýir. Oblys ortalyǵyndaǵy, №1 mektepte ornalasqan №59 saılaý bólimshesine búgin tańǵy 7.00-den bastap alǵashqy saılaýshylar daýys bere bastady. Bul týraly egemen.kz tilshisi habarlady.
Biz kelgen saǵat 8.30 shamasynda saılaýshylardyń belsendiligi kórinip turdy. Birinen soń biri nemerlerin jetektep kelip jatqandar bar. Bári de kóterińki kóńil kúıde.
Osy ýchaskede alǵashqylardyń biri bolyp daýys bergen zeınetker Valentına Vershınınanyń jasy 80-de eken. Qart saılaýshy qobaljyp, kóńili bosap kózine jas aldy. «Osy jasqa jetemin, daýys beremin dep kim oılapty» - deıdi. Pavlodarǵa sonaý bir jyldary Tomskiden oqý bitirip joldamamen kelipti. Uzaq jyldar «Energo» ortalyǵynda energetıka salasynda qyzmet etipti. Bul kúnniń ózi úshin de, qazaqstandyqtar úshin mańyzdy kún ekenin aıtty. «Bizdiń urpaqtarymyz baqytty kúnde ómir súrsin. Men daýys berip durys tańdaý jasadym», - dedi ájeı.
Al, saılaý ýchaskesiniń tóraǵasy Nurbol Omarovtyń aıtýynsha, barlyq qazaqstandyqtar úshin erekshe este qalatyn kún ekenin saılaýshylardyń saılaý bólimshesi ashyla salysymen erte kelgen belsendilikteri, el taǵdyry úshin beı-jaı qarmaıtyndary aıqyn ańǵartady. Birinshi kelgen jáne 18 jasqa bıyl tolyp, birinshi ret daýys berýge qatysyp otyrǵan azamattarǵa belsendilik tanytqandary úshin syılyqtar berilipti. Oblys ortalyǵynyń jastary da búgin erekshe belsendilik kórsetýde. Oblystyq saılaý komıssııasynyń tóraıymy Álııa Sabyrhanovanyń aıtýynsha, tańerteń oblys ortalyǵynda aralap shyqqan kezde 5 saılaý bólimshelerinde daýys berýge saılaýshylar kóptep kelip jatty. Aǵa urpaq ókilderimen qatar jastarymyzdyń ózderiniń azamattyq kózqarastaryn, jaýapkershilikterin kórsetip, belsendilik tanytyp jatqandary qýanyshty. Oblysta alǵashqylardyń biri bolyp, saılaý kúni 18 jasqa tolǵan 14 jas saılaýshy daýys berdi. Saılaý ýchaskelerinde olardyń árqaısysyn quttyqtap, eskertkish syılyqtar tapsyrylǵan. Pavlodar oblysynda tańǵy saǵat 7.00-de 576 ýchaske ashyldy, saılaýshylar tizimine 454 858 adam engen.
Bizdiń kelesi kelgen №79 saılaý bólimshesinde de belsendilik kórinip tur, ádemi kıimderin kıinip, qýanyshty kóńil kúıde kelip jatqan qala turǵyndaryn kórdik. Saılaýdyń barysyn baqylap otyrǵan baıqaýshylar eshqandaı tártipsizdikterdiń, zań buzýshylyqtardyń oryn almaǵanyn, bári de qalypty jaǵdaıda ótip jatqanyn aıtty.
Farıda Byqaı.
Derek, sýret: egemen.kz