Keshe Almaty qalasynda Memleket basshysynyń joǵary tıimdi sıfrlyq tehnologııalardy engizý jónindegi tapsyrmasyna baılanysty «Alataý» ınnovasııalyq tehnologııalar parki arnaıy ekonomıkalyq aımaǵynyń aýmaǵynda jol qozǵalysy erejelerin buzýdy tirkeýdiń mobıldi keshenin óndiretin alǵashqy zaýyttyń ashylý rásimi ótti.
Oǵan Almaty qalasy ákimdiginiń, Almaty qalasy Ishki ister departamentiniń, «Atameken» ulttyq kásipkerler palatasy Almaty qalasy boıynsha fılıalynyń ókilderi men kásipkerler qatysty.
«Alatau Smart Technology Kazakhstan» kompanııasynyń ókili Danııar Násipovtiń aıtýynsha, jańa IT-tehnologııalardy engizý, olardy kúndelikti qyzmette keńinen qoldaný búgingi tańda basty mindetterdiń biri ekendigin, onyń basty maqsaty qoǵamdyq tártipti, jol qozǵalysy qaýipsizdigin qorǵaýdy kúsheıtýge jáne quqyqtyq buzýshylyqty anyqtap, qylmysty ashýǵa baǵyttalǵan sapaly ınfraqurylymdy tartý ekendigin jetkizdi.
Atalǵan keshendi túrik óndirýshilerimen birlesip júrgizetin bolady. Bas zaýyt Túrkııanyń Ystanbul qalasynda ornalasqan. Olar shırek ǵasyrdan beri álem boıynsha osy ónimdi eksporttap keledi.
Jańa zaýyt bıylǵy jyly birinshi kezeńde 600, keler jylǵa qaraı bir myń mobıldi jáne bir myń stasıonarlyq keshenge deıin keńeıtýdi josparlap otyr. Jobaǵa 64 mlrd teńge jeke kapıtaldy ınvestısııa tartylyp, 30-dyń ústinde qurylatyn jumys ornyna 80-ge jýyq adamdy jumyspen qamtý kózdelgen.
Maqsaty – qoǵamdyq kólikter, jedel járdem, órtke qarsy jáne polısııa qyzmetkerleri kólikteriniń qajettilikterine oraılastyryp otyrǵany bar.
Búginderi zaýytta qoǵamdyq jáne jol qaýipsizdigi salasynda sapaly taýarlar alýǵa múmkindik beretin taqtalar men mıkrochıpter, korpýstyq bólik óndiretin ónerkásiptik jabdyqtar ornatylǵan.
Aldaǵy ýaqytta tehnologııalyq transfer salasyndaǵy ushqyshsyz ushý apparattary, patrýldik polıseılerge arnalǵan beınebaqylaý kózildirikteri, jaıaý patrýldeýshilerge arnalǵan jetondardy jáne basqa da noý-haýdy engizý josparlanǵan.