Premer-mınıstr Oljas Bektenov Parlament palatalarynyń birlesken otyrysynda qazir 98 úı sý astynda ekenin málimdedi, dep habarlaıdy Egemen.kz.
«Buryn-sońdy bolmaǵan sý tasqyny, tıisinshe, zardap shekken myńdaǵan azamattar úshin, jalpy el úshin, onyń ekonomıkasy men ınfraqurylymy úshin óte aýyr zardaptar. Tek 120 myńnan astam azamat úılerinen kóshirildi. Búgingi tańda 67 570 adam úılerine oraldy. Búgin tańerteńgi jaǵdaı boıynsha evakýasııalaý pýnktterinde 3952 adam qaldy. Jeke turǵyn úı qurylysyn aıtatyn bolsaq, barlyǵy 12 myń turǵyn úıdi jáne 26 myń saıajaıdy sý basqan. Búgingi tańda 98 úı sý astynda qalyp otyr», dedi Premer-mınıstr.
Bektenovtyń aıtýynsha, zardap shekkenderge kómek kórsetý boıynsha aýqymdy jumystar áli de jalǵasyp jatyr.
«Munda iri bıznes ókilderi eleýli qoldaý kórsetti, bıýdjettik resýrstar óte baıypty tartyldy. Búgingi tańda 33 141 otbasy 100 AEK kóleminde ótemaqy aldy. Bul maqsattarǵa bıýdjetten 12 mıllıard teńgeden astam qarajat bólindi», dedi O.Bektenov.
Sondaı-aq O.Bektenov búgingi kúnge deıin 17 982 úıge zertteý júrgizilip, 15 685 úıge baǵalaý júrgizilgenin atap ótti. Baǵalaý boıynsha úılerdiń jartysyna jýyǵy jóndeý men qalpyna keltirýdi qajet etetini belgili boldy. Qazirdiń ózinde 5823 otbasy jóndeý-qalpyna keltirý jumystary úshin ótemaqy aldy. Bul maqsattarǵa 38,6 mlrd teńge bólindi. Búginde 8 myńnan astam úı qaýipti dep tanyldy.
«Búgingi tańda 3155 otbasy jańa baspanaǵa ıe boldy. Ár óńirde 2049 turǵyn úıdiń qurylysy belsendi júrgizilýde. Turǵyn úıdi qalpyna keltirý men salýǵa barlyǵy 251 mıllıard teńge bólindi, onyń ishinde qaıyrymdylyq kómek pen bıýdjet qarajaty bar», dep túıindedi Oljas Bektenov.
Qyrmyzy JUMAǴALIQYZY,
EUÝ stýdenti