Germanııa sán-saltanatyn kelistirip, daqpyrtyn asyra ótkizip jatqan fýtbol dodasy tartysty oıyndarmen tarıhqa enip jatyr. Eýropa chempıonatynyń toptyq kezeńindegi 2-týrdy ortalaǵan quramalardyń keıbiri pleı-offqa shyǵýǵa áli de úmitin sóndirgen joq. Qurlyq dodasyna negizinen jigeri tas úgetin kókórim jastary kelgen Ispanııa quramasy da kúni buryn pleı-off kezeńine ótip qoıdy.
S tobynda 2-týrynda Slovenııa fýtbolshylary Serbııa quramasyn utqandaı edi. Iá, 69-mınýtta Jan Karnıchnık gol soǵyp, komandasyn alǵa shyǵaryp, tipti 90-mınýt túgesilgenge deıin basymdyqpen ótkizgen. Alańdaǵy bas qazy rýmyn Ishtvan Kovach negizgi ýaqytqa 6 mınýt qosyp berdi. Sońǵy sekýndtar syrǵyp jatqanda buryshtamadan jetken dopty Lýka Iovıch golǵa ulastyryp, quramasyn jeńilisten qutqardy. Matchtan keıin Serbııa quramasynyń bas bapkeri Dragan Stoıkovıch Iovıchtiń talantty fýtbolshy ekenin aıtty. Biraq negizgi quramda alańǵa shyǵarǵan joq, tek 64-mınýtta Vlahovıchtiń ornyna jiberdi.
«Oıynnyń óne boıynda dopqa ıelik etýde bizdiń jigitter basym boldy. Shabýyldaýshy qurama ekenimizdi aıqyndap berdik, negizgi maqsatymyz jeńiske jetý edi, teń nátıjeni de qanaǵat tutamyz. Biz árshqashan da sońyna deıin tartysqa baryp tabandylyq tanytatynymyzdy kórsettik», dedi Serbııa ulttyq quramasynyń bas bapkeri Dragan Stoıkovıch.
Slovenııa quramasynyń bas bapkeri Matıaj Kek shákirtteriniń Germanııaǵa serýen úshin kelmegenin, serbterge qarsy tartys ta Slovenııa fýtbolynyń tarıhyna altyn árippen ádipteletinin basa aıtty.
«Biz Slovenııa fýtbolynyń minezin kórsettik. Serbııa quramasynyń standartty shabýyldarda óte qaterli ekenin de bildik. Menińshe biz serbterdiń sońǵy shabýylynda aıylymyzdy sál erte bosatyp aldyq. Alda sheshýshi match tur, eńsemizdi tiktep, sol oıynǵa barymyzdy salamyz», dedi Matıaj Kek.
Bul toptyń favorıti sanalǵan Anglııa quramasy Danııa fýtbolshylarymen teń tústi. Aǵylshyndar dat fýtbolshylaryn erkin jeńedi dep boljaǵan jaýyrynshylardyń degeni dóp kele qoımady. 18-mınýtta Harrı Keınniń golynan keıin basymdyqty qolǵa alǵan aǵylshyndardyń qorǵanysy kóp ótpeı-aq syr berdi. 34-mınýtta Morten Iýlmann tarazy basyn teńestirdi. Qos komanda osy nátıjeni qanaǵat tutty. Bul toptan pleı-off kezeńine ótýge Anglııa quramasy bir taban jaqyndaı tústi. Danııa quramasynyń da toptan shyǵyp, pleı-offqa ótýge úmiti zor.
V tobyndaǵy 2-týrdy qorytyndylaǵan Ispanııa men Italııa quramalary arasyndaǵy tartystyń taǵdyryn Rıkardo Kalaforıdiń avtogoly sheshti. Ispanııa quramasynyń jas perileriniń kezekti shabýylyn toıtaram degen Rıkardonyń óz qaqpasyna avtogol soǵýynyń arqasynda Ispanııa quramasy 1/8 fınalǵa ótti. Bul osy Eýropa chempıonatyndaǵy besinshi avtogol bolyp tirkeldi.
Italııa quramasynyń jartylaı qorǵaýshysy Braıan Krıstante Ispanııa fýtbolshylarynyń tamasha oınaǵanyn jetkizdi. «Ras, bizdi olar ábden qyspaqqa aldy. Bul eldiń fýtbol oınaý máneri ózgeshe, bizdi ábden tıtyqtatty. Olar únemi dopty óz ıelikterinde ustap, basymdyqty jibermeýge tyrysady. Bizge de qarsy shabýyldardy óristetip, gol soǵatyn oraı týǵyzýdyń sáti kelgen, biraq qarsylastarymyz adym ashtyrmady», dedi jartylaı qorǵaýshy.