Adamnyń qabileti men múmkindigi ǵalamat. Tek óz boıyndaǵy sol bólekshe qasıetti túrli jattyǵýlar arqyly udaıy jetildire bilý kerek. Sonda ǵana adam aıtsa nanǵysyz nátıjege qol jetkize alady. Máselen, toǵyz jasynda aǵylshyn tilinen eresekterge sabaq berip, on tórt jasynda eki birdeı oqý ortalyǵyn ashyp, halyqaralyq IELTS emtıhanynan 8,5 ball alǵan mektep oqýshysy Saıa Qydyráli – sózimizdiń jarqyn dáleli.
«Qataryńnyń aldy bol» deıdi bataly sózde. Talap, talantymen kópti tánti etken Saıa qazir qatarlastaryn basyp ozyp, úlkenderdiń ózine úlgi bolyp júr. Alǵyr qyz aǵylshyn tilin tez úırenýdiń tetikterin alty jasynda meńgerip, nebári toǵyz jasynda ózgelerge shet tilin úırete bastaǵan. 10-synyp oqýshysynyń búginde 2000-nan astam shákirti bar. О́zi mektepte júrip, munyń bárine ol qalaı, qashan úlgerip júr? Aǵylshyn tiline alǵash qalaı qyzyqty?
«Abaı atamyz otyz segizinshi qarasózinde «Ǵylym-bilimdi áýel bastan bala ózi izdenip tappaıdy. Basynda zorlyqpenen ıakı aldaýmenen úıir qylý kerek, úırene kele ózi izdegendeı bolǵansha» deıdi ǵoı. Rasymen, aǵylshyn tilin alty jasar balanyń sanaly túrde úırenýi ekitalaı. Osyny bilgen anam túrli oıyndar arqyly bes jasymda shet tiline qyzyǵýshylyǵymdy oıatty. Ári qaraı ózimniń de yntam artyp ketti. Osylaısha, sheteldik maqalalardy oqyp, aı saıyn emes, kún saıyn bilimimdi shyńdaı tústim. Al qazir sabaqtan tys ýaqytymda zııatkerlik mektepterde sabaq berip, qosymsha tabys tabamyn», deıdi S. Qydyráli.
Aıta keteıik, alǵyr qyz anasynyń senimi men qoldaýyna alǵys retinde bıyl páter syılaǵan. Saıanyń endigi maqsaty – joǵary bilim alyp, bilikti maman bolý. Úırenýden jalyqpaıtyn, úıretýden aıanbaıtyn janǵa biz de sát-sapar tileımiz.