Bul týraly Premer-mınıstr Oljas Bektenov Senat depýtattarynyń saýalyna bergen jaýabynda aıtty, dep habarlaıdy Egemen.kz.
«Memleket basshysynyń kınematografııa salasyn reformalaý jónindegi tapsyrmasyn oryndaý maqsatynda Úkimet «Kınematografııa týraly» zańǵa ózgerister men tolyqtyrýlar engizip, kıno salasyn memlekettik qoldaýdyń jańa tetigin ázirlep jatyr. Engizilip jatqan túzetýlerdiń qatarynda otbasylyq kórýge arnalǵan qazaq tilindegi balalarǵa arnalǵan anımasııalyq fılmderdiń sanyn kóbeıtý týraly normalar bar. Tıisti zań jobasy Qazaqstan Respýblıkasy Parlamentiniń Májilisinde qaralyp jatyr», dedi Úkimet basshysy.
Premer-mınıstr Úkimettiń qaýlysymen bekitilgen Qazaqstannyń 2023-2029 jyldarǵa arnalǵan mádenı saıasatynyń tujyrymdamasy iske asyrylyp jatqanyn habarlady. Ol otandyq fılmderdiń, onyń ishinde anımasııalyq fılmderdiń úlesin 2022 jylǵy deńgeıden 2030 jyly 35%-ǵa deıin ulǵaıtýdy kózdeıdi (2023 jyly 18%, 2024 jyly 21%, 2025 jyly 25%, 2026 jyly 28%, 2027 jyly 30%, 2028 jyly 32%, 2029 jyly 35%).
«Anımasııalyq fılmderdi shyǵarý «Kınematografııa týraly» zań negizinde retteledi. Iаǵnı, bul zańda anımasııa óneriniń qurylymy keńinen qarastyrylǵan», dep naqtylady Oljas Bektenov.