Buqaralyq aqparat quraldarynyń qyzmetkerleri kúni qarsańynda Parlament Senatynda jýrnalıster arasyndaǵy «Parasat» baıqaýynyń laýreattaryn marapattaý rásimi ótti. Palata Tóraǵasy Máýlen Áshimbaev ár atalym boıynsha úzdik shyqqan jeńimpazdardy quttyqtap, júldelerin saltanatty túrde tabystady, dep habarlaıdy Egemen.kz QR Parlamenti Senatynyń baspasóz qyzmetine silteme jasap.
Máýlen Áshimbaev jýrnalıster qaýymyn quttyqtaı kele, BAQ Ádiletti Qazaqstan qurý baǵdaryn iske asyrýǵa belsendi qatysyp kele jatqan mańyzdy ınstıtýttardyń biri ekenin aıtty. Senat Spıkeri jýrnalısterdiń parlamenttik pýly zań shyǵarýshy organ men qoǵamdy baılanystyratyn mánge ıe ekenin de tilge tıek etti. Sondaı-aq ol elimizde bolyp jatqan oqıǵalar, Memleket basshysynyń bastamasymen qolǵa alynǵan reformalar, senatorlardyń jumysy jáne zańnamalyq ózgerister men qabyldanǵan sheshimder jaıynda aqparat taratyp, olardyń mańyzyn halyqqa dáıekti túrde jetkizip júrgen tilshiler qaýymy memleketimizdiń damýyna úlken úles qosyp otyrǵanyn atap ótti.
«Sońǵy jyldary elimizde Memleket basshysynyń bastamasymen Ádiletti Qazaqstan qurý jolynda aýqymdy jumys atqarylyp jatyr. Prezıdentimiz Qasym-Jomart Kemeluly Toqaev atap ótkendeı, bul – barsha azamattyń aldynda turǵan mańyzdy mindet. Osyǵan baılanysty keshendi saıası, ekonomıkalyq, áleýmettik reformalar iske asyrylyp keledi. Ulttyq qundylyqtardy dáripteý, ıdeologııa baǵytynda da mańyzdy qadamdar jasalyp jatyr. Memleket basshysy Ulttyq quryltaıdyń úshinshi otyrysynda osy saladaǵy negizgi basymdyqtardy belgilep berdi. Sol qaǵıdattardy jáne atqarylyp jatqan jumystar men qabyldanǵan zańdardy halyqqa jetkizip, olardyń mánin túsindirýde buqaralyq aqparat quraldary qyzmetkerleriniń róli zor», dedi Máýlen Áshimbaev.
Bul rette Senat jumysyndaǵy basym baǵyttardyń biri óńirlerdiń damýyna yqpal etý, sondaı-aq, jergilikti ókildi jáne atqarýshy organdarmen birlesip ózekti problemalardy sheshý ekeni belgili. Osyǵan baılanysty Máýlen Áshimbaev BAQ-nyń bolǵan oqıǵany jedel jáne obektıvti jarııalaýy, senatorlardyń depýtattyq saýaldary boıynsha sıýjetteri men maqalalary, turaqty komıtetterdiń qyzmeti men qabyldanyp jatqan zańdar týraly taldamalyq materıaldary asa mańyzdy ekenine basa nazar aýdardy. Sondyqtan da senatorlardyń BAQ ókilderimen baılanysty odan ári nyǵaıtýǵa múddeli ekenderin aıtty.
«Parlament osy sessııada 100-ge jýyq zań qabyldady. Barlyq zań halyqtyń ómir súrý sapasyn arttyrýǵa, elimizdi odan ári damytýǵa jáne azamattarymyzdyń quqyqtaryn qorǵaýǵa arnalǵan. Osy rette áıelderdiń quqyqtary men balalardyń qaýipsizdigin qorǵaýǵa, qoǵamdyq baqylaýdy arttyrýǵa jáne memlekettik satyp alý júıesin jetildirýge arnalǵan zańdardy erekshe atap ótken jón. Mańyzdy normalardyń qatarynda «Mass-medıa týraly» zań da bar. Bul qujat mass-medıa salasyndaǵy zańnamany júıeli túrde jetildirýdi kózdeıdi. Zań shyǵarý qyzmetimen birge Senat mańyzdy máselelerge arnalǵan Úkimet saǵattary, Parlamenttik tyńdaýlar, dóńgelek ústelder jáne halyqaralyq is-sharalar ótkizdi. Senatorlardyń óńirlerge saparyn da aıryqsha atap ótken jón. Osy jumystyń bárine ózderińiz de qatysyp, olardyń mańyzyn halyqqa jetkizip kelesizder. Senat árdaıym buqaralyq aqparat quraldarymen tyǵyz baılanysta jumys isteıdi. Aldaǵy ýaqytta osy baılanys odan ári artady dep senemin», – dep, Máýlen Áshimbaev BAQ ókilderine zor densaýlyq, baq-bereke jáne shyǵarmashylyq tabys tiledi.
Aıta keterligi, bıyl «Parasat» baıqaýyna qatysýǵa telearnalar, radıo, gazet, aqparat portaldary jáne basqa da medıadan elimiz boıynsha 120-ǵa jýyq jumys kelip tústi.
2024 jylǵy «Parasat» baıqaýynyń jeńimpazdary
Úzdik televızııalyq materıal: Aıdarbek Balǵabekov – «24KZ» telearnasynyń Soltústik Qazaqstan oblysyndaǵy menshikti tilshisi, Farıza Bolatbek – «Atameken Business» telearnasynyń tilshisi.
Úzdik radıomaterıal: Almas Baıdrahmanov – «Qazaq radıosynyń» tilshisi.
Merzimdi baspasózdegi úzdik materıal: Eskendir Zulqarnaı – «Egemen Qazaqstan» gazetiniń tilshisi, Ekaterına Baınıasheva – «Nash Kostanaı» gazetiniń tilshisi.
Internet-basylymdaǵy úzdik jarııalanym: Rýslan Ǵabbasov – «QazAqparat» halyqaralyq aqparat agenttiginiń tilshisi, Áıgerim Ýmmat – «Informburo.kz» aqparat agenttiginiń tilshisi.
Áleýmettik jelilerdegi úzdik jazba: Bolat Buharbaı – «Jaqsy Bolady» Youtube-arnasynyń avtor-júrgizýshisi, Abaı Tilenshıev – «Abay Live» Youtube-arnasynyń avtor-júrgizýshisi, Renat Tashkınbaev – «Drýgıe mesta» blogynyń avtory.
Jyldyń arnaıy syılyǵy – «Úzdik analıtıkalyq materıal»: Amangeldi Seıithan – «Qazaqstan» ulttyq telearnasynyń tilshisi, Arýjan Dáribaı – «Tengrinews.kz» aqparattyq ınternet-portalynyń tilshisi, Laýra Túsipbekova – «Kazahstanskaıa pravda» gazetiniń tilshisi.