Germanııadaǵy fýtbol toıynyń der shaǵy qazir. Keı qurama kıim-kepshigin teńdep, kóshiniń basyn eline buryp ta jatyr. Toptyq kezeńdegi sheshýshi matchtar asa tartysty ótti. Tipti birde-bir jeńissiz tek teń nátıjeni qanaǵat tutyp-aq pleı-off kezeńine ótken quramalar bar.
S tobyndaǵy 3-týr tartysynda gol soǵylmady. Danııa men Serbııa quramalary arasyndaǵy matchty basymdyqpen ótkergen dat fýtbolshylary serbterdiń qorǵanysyn buza almady. Dopqa ıelik etýde, standartty (buryshtama) shabýyldarda da Danııa quramasy basym turǵanymen, jeńisti julyp ákete almaı, 0:0 nátıjesin mise tutty.
Bul toptaǵy kezekti oıyn Anglııa men Slovenııa arasynda órbigen. Hárrı Keın bastaǵan Anglııa quramasy gol soǵa almady. Toptyq kezeńniń sońǵy matchynan mańyzdy 1 upaıdy enshilegen Slovenııa quramasy da tarıhı qadam jasady. Bul toptan Anglııa quramasy 5 upaı jınap kósh basyna shyqsa, Danııa quramasy 3 upaımen pleı-off kezeńine ótti. 3 upaı enshilegen Slovenııa quramasy da toptan shyǵyp otyr. Danııa men Slovenııa quramalary toptyq kezeńde ótkizgen úsh matchta jeńilgen de, jeńgen de joq, teń tarqasyp, ár oıynnan 1 upaı oljalaýmen-aq pleı-offqa ótip aldy.
Eýropa chempıonatynyń fınaldyq kezeńine osymen ekinshi ret at baılaǵan Slovenııa toptyq kezeńge alǵash ret shyǵyp otyr. 2018 jyldan beri Slovenııa ulttyq quramasyn baptap kele jatqan Matıaj Kek tarıhı nátıjeni enshisine jazǵanyna qýanyshty ekenin ańǵartty. «Jigitterge sóz joq, keremet oıyn órnegin kórsetti. Slovenııa shaǵyn ǵana memleket bolsa da, sportta, ásirese fýtbolda alpaýyt ekenimizdi taǵy bir kórsettik. Quramanyń toptyq kezeńnen ótetinine senim artqandardyń qatary tym seldir edi, biz olardyń kúmánin kúl talqan ettik. Jigitter Eýropa chempıonatyna tekke kelmegenin dáleldedi. Shákirtterim tartysty oıyny arqyly Slovenııa fýtbolynyń keleshegi qandaı ekenin aıqyndaı tústi», dedi Matıaj Kek.
D tobyndaǵy sońǵy oıynda Fransııa men Polsha quramalary kezdesti. Toptyq kezeńdegi eki matchta jeńilis taýyp, Eýropa chempıonatyn erte aıaqtaǵan polıak fýtbolshylarynyń Fransııa quramasymen teń oınaýy (1:1) biraz jaıtty ańǵartqandaı. Kılıan Mbappeniń 56-mınýtta penaltıden soqqan golyna 79-mınýtta Robert Levandovskıı penaltıden gol toǵytý arqyly qarymta qaıtaryp, mańyzdy 1 upaı enshilegenimen, 2008 jyldan beri Eýropa chempıonatynyń fınaldyq kezeńine turaqty qatysyp kele jatqan Polsha quramasy eline qaıtty. О́ziniń sońǵy Eýropa chempıonatyna qatysqan Robert Levandovskıı quramanyń óskendigin, azýly Fransııa fýtbolshylarymen teń oıyn kórsetkenine kóńili tolatynyn jetkizdi. «Biz qandaı tańdaýly quramaǵa qarsy oınasaq ta ataǵynan yqpaıtynymyzdy kórsettik, jigitter minez tanytyp oınady. Osy teń nátıjeni baǵalaı bilýimiz kerek», dedi Polsha quramasynyń kapıtany.
Bul toptan Aýstrııa ulttyq quramasy kósh bastap pleı-off kezeńine ótti. 3-týr matchynda Nıderland quramasyna qarsy alańǵa shyǵyp, 2:3 esebimen eńserip ketti. 6-mınýtta Donıell Malen avtogol soǵyp, aýstrııalyqtar alǵa shyqty. 47-mınýtta Kodı Gakpo nátıjeni teńestirgen. 59-mınýtta Romano Shmıd enshisine gol jazyp, quramasyn alǵa shyǵarǵan. Tájirıbeli Memfıs Depaı 75-mınýtta komandasyn jeńilisten qutqarǵanymen, 80-mınýtta Marsel Zabıtser jeńis golyn soqty. 2008 jyldan beri Eýropa chempıonatynyń fınaldyq kezeńine tórt ret qatysqan Aýstrııa ulttyq quramasy tórt jyl buryn qurlyq dodasynyń 8/1 fınalyna deıin jetken bolatyn.
Selfıdiń salqyny: ÝEFA kúzetti kúsheıtpek
ÝEFA Germanııada ótip jatqan Eýropa chempıonatynda tártipti kúsheıtýdi myqtap qolǵa aldy. Oǵan Portýgalııa, Túrkııa arasyndaǵy tartys sebep bolyp otyr. Munyń aldynda Grýzııa men Túrkııa jankúıerleriniń jaǵa jyrtysyna asa alańdaı qoımaǵan Eýropa fýtbol assosıasııasy odaǵy (ÝEFA) áıgili Ronaldýmen sýretke túsýge umtylǵan jankúıerlerdiń áreketinen keıin ǵana qozǵaldy. Túrkııa men Portýgalııa quramalary arasyndaǵy tartysta alańǵa bir emes, alty jankúıer júgirip shyǵyp, Ronaldýmen sýretke túsýge umtylǵan edi. Matchtyń mazasyn qashyryp, shyrqyn buzǵan keleńsizdikten keıin qaýipsizdik sharasy kúsheıtiletin boldy. ÝEFA basshylyǵy fýtbolshylardyń stadıonda, alańda ǵana emes, kıim aýystyratyn bólmede de qaýipsizdigi zor jaýapkershilik júkteıtinin jetkizdi. 2016 jyly Eýropa chempıony atanǵan Portýgalııa quramasynyń bıylǵy qurlyq dodasyndaǵy matchy Germanııanyń qaýipsizdikke jaýapty qyzmetkerlerine qosymsha jumys taýyp berdi.