Vandaldar Aqtóbe qalasyndaǵy ashyq aspan astyndaǵy avıatehnıka murajaıyna shabýyl jasady. Ákimdik merdigerdi sotqa berip jatqanda, vandaldar kórermen nazaryna qoıylǵan tehnıkany bólshektep júr, dep habarlaıdy Egemen.kz «Astana» telearnasyna silteme jasap
Bul rette atalǵan murajaı resmı túrde áli ashylmaǵanyn aıta ketý kerek. Ushý ınstıtýtynyń aýmaǵynda ótken ǵasyrda paıdalanylǵan tikushaq, pen azamattyq ushaqtar qoıylǵan. Olar retke keltirilip, boıalǵan, biraq qysqa ýaqyt ishinde ushaqtardyń bortynda bógde sýretter paıda bolyp, keı jerine zaqym keltirilgen. Biraq vandaldardy toqtatatyn eshkim joq – saıabaqta kúzetshiler de, beınebaqylaý kameralary da joq.
Buryn bul aımaq Áýe qorǵanysy kúshterine qarasty Áskerı ınstıtýttyń qaramaǵynda bolǵan. Eki jyl buryn saıabaq ákimdiktiń balansyna kóshti. Qala ákimdigi aýmaqty kórkeıtip, ashyq aspan astyndaǵy murajaı qurýdy josparlaǵan. Tıisti jumystar ótken jyldyń sońyna deıin aıaqtalýy tıis edi. Biraq jaýapty merdiger mindettemelerdi oryndaýdan jaltardy. Aqyry saıabaqtyń resmı ashylý merzimi belgisiz ýaqytqa shegerildi.
«Merdiger shart boıynsha belgilengen jumystardy aıaqtaǵan joq. Atap aıtqanda, saıabaqta jaryq joq, jaıaý júrginshiler joly da sońyna deıin salynbaǵan, aýmaqty kógaldandyrý tıisti deńgeıde júrgizilmegen. Biz kompanııaǵa jumystardyń oryndalmaýyna baılanysty sotqa deıingi nusqama joldadyq. Jaqyn arada sotqa júginemiz», dep túsindirdi Aqtóbe qalasynyń jolaýshylar kóligi jáne avtojoldar bóliminiń mamany Talǵat Naýryzov.