Májilistegi «Amanat» fraksııasynyń keńeıtilgen jıynynda depýtattar Úkimet múshelerimen birge partııanyń saılaýaldy baǵdarlamasynyń júzege asyrylý barysyn talqylady.
Sóz basynda Májilis spıkeri, partııa tóraǵasy Erlan Qoshanov «Amanat» parlamenttik kópshilik partııa retinde Memleket basshysyna Premer-mınıstrdiń kandıdatýrasyn usynǵanyn jáne Úkimet quramyn jasaqtaýǵa tikeleı atsalysqanyn eske saldy. Sondyqtan «Halyqpen birge!» saılaýaldy baǵdarlamasynyń sapaly oryndalýy – partııanyń, depýtattyq korpýstyń jáne Úkimettiń ortaq jaýapkershiligi.
«Saılaýaldy baǵdarlama – bizdiń basty qujatymyz. Bul – el damýyna daýys bergen mıllıondaǵan otandasymyzdyń senimi. Sondyqtan halyqtyń úmitin aqtap, osy ýádelerdi oryndaý – bizdiń ortaq jaýapkershiligimiz. Prezıdent Qasym-Jomart Toqaev 2029 jylǵa qaraı el ekonomıkasyn eki ese arttyrý mindetin qoıdy. Munyń bári partııanyń saılaýaldy baǵdarlamasynda jáne bekitilgen Jol kartasynda kózdelgen. Úkimetpen de kelisilgen. Buǵan salalyq mınıstrlikter men fraksııa músheleri tikeleı jaýap beredi», dedi E.Qoshanov.
Sonymen qatar partııa tóraǵasy partııanyń saılaýaldy baǵdarlamasyn oryndaý boıynsha Jol kartasyn júzege asyrýdaǵy oń dınamıkaǵa nazar aýdardy. Máselen, turǵyn úı qoljetimdiligin arttyrý úshin 2023 jyly elimizde 17 mln sharshy metr turǵyn úı paıdalanýǵa berildi. Jol kartasy boıynsha 15,5 mln sharshy metr turǵyn úı salý kózdelgen bolatyn. «Jer amanaty» jobasy aıasynda 10 mln gektardan astam aýyl sharýashylyǵy jerleri memleket menshigine qaıtaryldy.
Premer-mınıstrdiń orynbasary – Ulttyq ekonomıka mınıstri Nurlan Baıbazarov partııanyń saılaýaldy baǵdarlamasyn júzege asyrý boıynsha Úkimettiń atqarǵan jumysy týraly baıandady. Ol ekonomıkany damytý, bıznesti, aýyl sharýashylyǵyn, óndiristi qoldaý, azamattardyń tabysyn arttyrý, áleýmettik saıasatty jaqsartý, jumyspen qamtý máselelerin sheshý, óńirlerdiń ınfraqurylymdyq damýy jáne ózge de mańyzdy baǵyttar boıynsha qabyldanǵan sharalarǵa egjeı-tegjeı toqtaldy.
«Úkimet óziniń barlyq áleýmettik mindettemelerin oryndap keledi. Bul maqsattarǵa respýblıkalyq bıýdjettiń 40%-dan astam qarajaty bólinedi. Máselen, byltyrdan bastap ataýly áleýmettik kómek sheńberinde 1 jastan 6 jasqa deıingi árbir balaǵa 1,5 AEK mólsherinde qosymsha tólem belgilendi. 2023 jyly bul tólemdi 186,8 myń bala aldy. Buǵan qosa bıyl bazalyq zeınetaqynyń eń tómengi mólsheri 65%-ǵa, al eń joǵary mólsheri eń tómengi kúnkóris deńgeıiniń 105%-na deıin ulǵaıtyldy. Aıta keteıik, búginde Qazaqstan TMD elderi arasynda eń joǵary ortasha zeınetaqy mólsherine ıe», dedi N.Baıbazarov.
Sonymen qatar túrli sanattaǵy azamattardyń: áskerı qyzmetshilerdiń jalaqysy – 50, tótenshe jaǵdaılar qyzmetkerleriniń jalaqysy – 40, dárigerlerdiń eńbekaqysy – 30, medısına qyzmetkerleriniń jalaqysy – 20, mádenıet jáne arhıv isi qyzmetkerleriniń eńbekaqysy 20 paıyzǵa ósti. Sonymen qatar byltyr 67 myń oryndyq 611 mektepke deıingi mekeme jáne 137,8 myń oryndyq 165 mektep ashyldy. 473 myń jas azamat jumysqa ornalastyryldy. Premer-mınıstrdiń orynbasary turǵyn úımen qamtamasyz etý sharalaryna jeke toqtaldy.
«Jyl sońyna deıin 18 mln sharshy metr turǵyn úı salý josparlanyp otyr. Bıyl jalǵa beriletin turǵyn úı qurylysyna «Samuryq-Qazynadan» alǵash ret 272 mlrd teńge bólindi, onyń 40%-y aýdandyq deńgeıdegi turǵyn úı qurylysyna arnalǵan. Sondaı-aq bıyl «Otbasy bank» jelisi boıynsha 20 myń otbasyna 7-9% jeńildikpen nesıe berý josparlanǵan», dedi N.Baıbazarov.
Premer-mınıstrdiń orynbasary 2023 jyly shıkizattyq emes taýarlar men qyzmetterdiń jalpy eksporty 35,6 mlrd dollarǵa jetkenin aıtty. Ol sondaı-aq depýtattardy aýyl sharýashylyǵyn memlekettik qoldaýdyń júıeli sharalary týraly habardar etti. Búginde «Aýyl amanaty» jobasy aıasynda 89,9 mlrd teńge somasyna 14,2 myń shaǵyn nesıe berildi. Bul qadam 15,7 myńnan astam jumys ornyn qurýǵa múmkindik berdi.
«Amanat» partııasynyń hatshysy Erjan Jylqybaev jergilikti jerdegi partııalyqtar jaýapty memlekettik organdarmen birge saılaýaldy ýádelerdiń júzege asyrylýyna turaqty monıtorıng júrgizýdi jalǵastyryp jatqanyn atap ótti.
«Búginde salynyp jatqan nysandarda 600-den astam partııalyq baqylaý beketteri ornalastyryldy. Oǵan 12 myńnan astam partııa múshesi jumyldyryldy. Máslıhattardaǵy partııa fraksııalarynyń jıyndarynda jergilikti atqarýshy organdardyń esebi tyńdaldy. Sondaı-aq partııalyq baqylaý komıteti atqarǵan jumystar nátıjesinde saılaýaldy baǵdarlamany oryndamaǵany nemese tıisti deńgeıde júzege asyrmaǵany úshin 36 partııa múshesi partııalyq jaýapkershilikke tartyldy», dedi ol.
Sonymen qatar Májilis depýtattary partııanyń saılaýaldy baǵdarlamasyn júzege asyrýdyń keıbir pýnktteri boıynsha, onyń ishinde balabaqshalar ashý, aǵash otyrǵyzý, áleýmettik jaǵdaıy osal toptarǵa turǵyn úı berý jáne taǵy basqa baǵyttar boıynsha artta qalýshylyq bar ekenine Úkimet músheleriniń nazaryn aýdardy.
Jıyndy qorytyndylaı kele, «Amanat» tóraǵasy fraksııa músheleri men mınıstrler Prezıdenttiń saılaýaldy baǵdarlamasynyń júıeli júzege asyrylýyn baqylaýdy kúsheıtýi kerek ekenin atap ótti.
«Ár depýtat óziniń saılaýaldy ýádeler blogin muqııat taldap, mınıstrliktermen tyǵyz jumys isteýge tıis. Qajet bolǵan jaǵdaıda bıýdjetti qaraý kezinde usynystar engizý kerek. Bul – Prezıdent Qasym-Jomart Toqaevtyń saılaýaldy baǵdarlamasy men Joldaýlaryndaǵy naqty tapsyrmalary, «Amanat» partııasynyń halyqqa bergen ýádeleri jáne Úkimettiń eldi damytý, azamattardyń ál-aýqatyn jaqsartý jónindegi mindettemeleri», dedi E.Qoshanov.