Táýelsizdik jyldary týǵan jastardyń Alash uranymen rýhtanbaǵany kemde-kem. Biri Álıhan, biri Shoqaı, biri Mirjaqyp bolyp ázirge úlken arman arqalaǵan ulandardy kórdik. Ultqa uran bolǵan erler isi bir mysqal da umytylmaı, jańǵyrýynyń dáleli osy.
Bala kúnde úlken aǵam Oralhan únemi Mustafa Shoqaı týraly aıtyp otyratyn. Keıde «Qalaı da ultqa qyzmet etý kerek!» dep tistenip qoıatyn. Ár duǵa etkeninde Alash arystary Mirjaqyp, Júsipbek, Ahmetterdi qosa kúbirlep rýhyna duǵa etetin. Sol kisiniń yqpaly da bolar, alashshyl bolyp óstik. «Ult úshin ne isteı alamyn?» degen suraq sanadan óshpeı, maıak syndy jyltyldap turdy. Keıde pendelik jeline boı aldyrar sátte «men osy ne istep júrmin? Ultqa qyzmet eter tulǵa emespin be? Sertten taıǵanym ba?» dep óz-ózimizdi jaýapqa alyp otyrýdy ádetke aınaldyrdyq. Qaıbir jyly Máskeý tórinde zıraty belgisiz sheıitterdi oılap uzaq tolǵanǵanymyz da bar. Jalǵyz ǵana beriler jaz ómirdi jan raqatyna emes, adam tózgisiz mehnatty ult jolyna qurban etken arystardyń ár isi, ár sózi búginde esti jastyń uranyna aınalyp otyr.
«Adamdyq boryshyń –
Halqyńa eńbek qyl.
Aq joldan aınymaı
Ar saqta, ony bil.
...Qaıtadan qaırylyp
Qaýymǵa kelmeısiń.
Baryńdy, nárińdi
Tirlikte bergeısiń.
Ǵıbrat alar artyńa
iz qaldyrsań –
Shyn baqyt‚ osyny uq,
Máńgilik ólmeısiń!»
Alash qaıratkeriniń biri, aǵartýshy, aqyn Shákárim Qudaıberdiulynyń bolashaqqa jasap bergen tańbaly óleńi oıǵa tutqa bolarlyq. «Janym – arymnyń sadaǵasy» degen ár qazaq balasy jeke muńynan ult muńyna, adamdyq muńyna kóterilse, eldigimiz ertegideı qııaǵa samǵaıtyny anyq. Iá, sol kúnge jete bereıik!