Qasym-Jomart Toqaev pen Sı Szınpın Astana halyqaralyq ýnıversıtetiniń bazasynda Beıjiń Til jáne mádenıet ýnıversıtetiniń fılıalyn ashty, dep habarlaıdy Egemen.kz Aqordanyń baspasóz qyzmetine silteme jasap.
Búgin eki el basshylary Qazaqstannyń Beıjińdegi jáne Qytaıdyń Astanadaǵy mádenı ortalyqtaryn saltanatty túrde ashty.
Bul ortalyqtar eki memlekettiń gýmanıtarlyq yntymaqtastyǵyn damytýdyń jańa kezeńine jol ashady. Sondaı-aq dostas eki el halyqtary arasyndaǵy ózara túsinistikti nyǵaıtýǵa baǵyttalǵan túrli mádenı sharalar, kórmeler, dárister men sheberlik sabaqtaryn ótkizýge arnalǵan alańǵa aınalady.
Muny aıtýly oqıǵa deýge bolady. Qazaqstan men Qytaı joǵary oqý oryndarynyń yntymaqtastyǵy stýdentterdiń tereń bilim alýyna jáne kásibı turǵyda ósýine zor múmkindik beredi jáne olardyń tildik daǵdylardy, mádenıetaralyq kommýnıkasııany jáne ǵylymı zertteý ádisterin meńgerýine yqpal etedi.
Bul jobalardyń tabysty júzege asyrylýy mádenıet jáne bilim salalaryndaǵy ózara almasýlardy jandandyrý, eki el arasyndaǵy saıası jáne ekonomıkalyq qatynastardy damytý jolyndaǵy mańyzdy qadam bolmaq.