Memleket basshysy Qasym-Jomart Toqaev Qytaı delegasııasymen aradaǵy búgingi kelissóz nátıjelerin joǵary baǵalaıtynyn málimdedi, dep habarlaıdy Egemen.kz.
«Qazaqstan men Qytaı arasyndaǵy qarym-qatynastyń deńgeıi qashanda joǵary. Osylaısha, biz eki el arasyndaǵy yntymaqtastyqtyń jańa kezeńine qadam bastyq. «Altyn otyz jyldyq» aıasyndaǵy bıik maqsat-mindetterdi tabysty júzege asyramyz dep úmittenemin. Jasalǵan árbir kelisim eki eldiń turaqty ári qaýipsiz damýyn qamtamasyz etýge, halyqtarymyzdyń ál-aýqatyn jaqsartýǵa arnalǵan», dedi Qazaqstan Prezıdenti.
QHR Tóraǵasy kelissózderdiń jyly, dostyq ráýishte ótkenin jáne nátıjeli bolǵanyn málimdedi.
«Biz birqatar aýqymdy másele boıynsha ýaǵdalastyqqa qol jetkizdik. Qytaı men Qazaqstan arasyndaǵy Birlesken málimdemege qol qoıyp, yntymaqtastyqtyń basym baǵyttaryn aıqyndadyq. Bizdiń qatysýymyzben saýda-ekonomıkalyq, kólik-logıstıkalyq, energetıkalyq, aýyl sharýashylyǵy, ǵylymı-tehnıkalyq jáne mádenı-gýmanıtarlyq salalar boıynsha birqatar úkimetaralyq jáne vedomstvoaralyq qujatqa qol qoıyldy. Atalǵan qujattar ekijaqty qatynasymyzdyń joǵary deńgeıde damýyna tyń serpin beredi», dedi Sı Szınpın.
QHR Tóraǵasy Qytaı men Qazaqstan jańǵyrý jolymen alǵa ilgerilep, ózara qoldaý bildirýdiń ıgi dástúrin birlese damytatynyna jáne eseleı túsetinine, sondaı-aq ózara saıası senimdi turaqty túrde nyǵaıtyp, ulttyq damý strategııalaryn ushtastyrýǵa yqpal etetinine jáne bir-biriniń múddesin qorǵaıtynyna senim bildirdi.
«Bir beldeý, bir jol» bastamasy aıasynda joǵary deńgeıdegi yntymaqtastyqty jalǵastyra beremiz. Naqty salalardaǵy yqpaldastyq baǵytynda jańa nátıjelerge qol jetkizýge umtylamyz. Qysqa merzim ishinde taýar aınalymyn eki ese ulǵaıtý jóninde jańa mindet qoıyldy. Biz saýda jáne ekonomıka, ınvestısııa, ındýstrııalandyrý, kólik jáne energetıka sııaqty salalardaǵy baılanysymyzdy udaıy nyǵaıtý jóninde ýaǵdalastyq. Saýda-ekonomıkalyq yntymaqtastyq baǵdarlamasyn júzege asyrý jónindegi jol kartasyn belsendi iske asyramyz. Transkaspıı halyqaralyq kólik baǵyty men elderimiz arasyndaǵy úshinshi transshekaralyq temir jol qurylysyn jedeldetemiz. Sonymen qatar negizgi mıneraldyq resýrstar, balamaly energııa kózderi, ǵylymı-tehnıkalyq ınnovasııalar, avıasııa jáne ǵarysh, sıfrlandyrý salalaryndaǵy damýdyń jańa baǵyttaryn birlese ilgeriletýge nıettimiz», dedi QHR Tóraǵasy.
Sı Szınpın BUU, ShYU, «Qytaı – Ortalyq Azııa» sııaqty kópjaqty alańdar jelisi boıynsha tyǵyz yqpaldastyq ornatqany jóninde atap ótti. Sondaı-aq Qazaqstannyń BRIKS-ke kirýin qoldady. QHR Tóraǵasy Qazaqstannyń álemdegi orta derjava retindegi róli artyp kele jatqanyn taǵy da rastady jáne elimizdiń jahandyq basqarý isine laıyqty úles qosa alatynyna senim bildirdi.