Kezdesý barysynda Qasym-Jomart Toqaev ShYU sammıtine arnaıy qatysqany jáne Astananyń bastamalary men basymdyqtaryn turaqty túrde qoldap kele jatqany úshin Emomalı Rahmonǵa rızashylyǵyn bildirdi, dep habarlaıdy Egemen.kz Aqorda baspasóz qyzmetine silteme jasap.
Qazaqstan Prezıdenti ekijaqty yntymaqtastyqtyń barlyq baǵytta qarqyndy damyp kele jatqanyn atap ótti. Onyń aıtýynsha, Qazaqstan men Tájikstan shyn máninde odaqtastyq qatynastardy jolǵa qoıa bildi. Buǵan Emomalı Rahmonnyń sińirgen eńbegi orasan.
Tájikstan Prezıdenti óz kezeginde Qazaqstannyń ShYU-daǵy tóraǵalyǵy tabysty ótkenin aıtty. Sondaı-aq eki eldiń saýda-ekonomıkalyq, mádenı gýmanıtarlyq salalardaǵy jáne qaýipsizdik baǵytyndaǵy yntymaqtastyǵy josparly túrde damyp kele jatqanyn atap ótti.
Sonymen qatar Qasym-Jomart Toqaev pen Emomalı Rahmon eki eldiń halyqaralyq uıymdar aıasyndaǵy ózara yqpaldastyǵynyń jekelegen aspektilerin qarastyrdy.