Qasym-Jomart Toqaev Ilham Álıevpen kezdesý ótkizdi

Memleket basshysy Qazaqstan men Ázerbaıjan arasyndaǵy strategııalyq seriktestik pen odaqtastyq rýhynda damyp, jańa mazmunmen josparly túrde tolyǵyp kele jatqan jan-jaqty yntymaqtastyqtyń dınamıkasyn joǵary baǵalady. «Men Bakýge jáne Shýshaǵa jasaǵan saparymdy únemi eske alamyn. Bul, shyn máninde, betburysty, mańyzdy, tarıhı máni bar sapar boldy desek, artyq aıtqandyq emes. Kelissózder barysynda biz birqatar strategııalyq sala boıynsha ózara yqpaldastyqty odan ári damytýǵa tyń serpin berdik», dedi Qazaqstan Prezıdenti.

Eki el basshylary ınvestısııa, ónerkásip, energetıka, kólik jáne logıstıka salalaryndaǵy birlesken jobalardyń júzege asyrylý barysyn talqylady. Osy oraıda Transkaspıı halyqaralyq kólik baǵdaryn tıimdi paıdalaný máselesine aıryqsha nazar aýdaryldy.

Ilham Álıev dástúrli túrde qurmet kórsetkeni úshin Qasym-Jomart Toqaevqa alǵys aıtyp, memleketaralyq baılanystardyń barlyq baǵyty boıynsha Astanamen ekijaqty yntymaqtastyqty odan ári nyǵaıtýǵa Bakýdiń beıildi ekenin rastady.

Ilham Álıev Ázerbaıjan men Armenııa arasyndaǵy kelissózder úderisine atsalysqany úshin Qasym-Jomart Toqaevqa alǵys aıtty. Sondaı-aq Qazaqstannyń álemdik qoǵamdastyqtyń laıyqty múshesi retinde aımaqta ǵana emes, halyqaralyq arenada da mańyzdy ról atqaratynyn atap ótti.

Áńgimelesý barysynda saýda-ekonomıkalyq jáne mádenı-gýmanıtarlyq yntymaqtastyqty odan ári tereńdetý perspektıvalary qarastyryldy. Sonymen qatar halyqaralyq uıymdar aıasyndaǵy yqpaldastyqty odan ári damytý máseleleri jóninde pikir almasty.

Kezdesý sońynda eki el basshylarynyń qatysýymen «Samuryq-Qazyna» AQ men Azerbaijan Investment Holding arasyndaǵy Birlesken ınvestısııalyq qordy basqarý týraly kelisimge qol qoıyldy.