Atyraý oıyn-saýyq saıabaǵynda attraksıon úzilip, saldarynan bes bala zardap shekti, dep habarlaıdy Egemen.kz Azh.kz saıtyna silteme jasap.
Oqıǵa 2 shilde kúni keshke «Keremet» saıabaǵynda bolǵan. Áleýmettik jelide paıda bolǵan kadrlarda «Forsaj» attraksıony qulap, adamdardy basyp qalǵan.
Atyraý oblystyq densaýlyq saqtaý basqarmasynyń málimetinshe bes bala oblystyq aýrýhanaǵa jetkizilgen. Medısınalyq kómek kórsetilgennen keıin tórteýi úılerine jiberilip, bir bala aýrýhanada qalǵan.
«Atalǵan fakti boıynsha Qylmystyq kodekstiń 306-babynyń 2-bóligi («Qaýipsizdik talaptaryna saı kelmeıtin taýarlardy shyǵarý nemese ótkizý, jumystardy oryndaý nemese qyzmetterdi kórsetý») boıynsha qylmystyq is qozǵaldy», dep habarlady Atyraý oblystyq polısııa departamenti.
Azh.kz saıtynyń málimetinshe saıabaq ákimshiligi ázirge jaǵdaıǵa qatysty pikir bildirmegen.
Aıta keteıik, osydan eki jyl buryn Atyraýda átkenshek úzilip, balalar qulap qalǵan edi.