Aýyldyń ajaryn ashyp, kórkin kirgizý jolyndaǵy ıgilikti ister legi birinen soń biri atqarylyp, turǵyndardyń kóńil kúıin shat-shadyman etip jatyr. Kópten kútken saıabaqtardyń qurylysy aıaqtalyp, aýyldaǵy aǵaıyn bir jasap qaldy. Endi qala qyzyǵyna telmirmeı, aýylda da ýaqytyn kóńildi hám tıimdi ótkize alady.
«Azamat Qurylys» JShS halyq sany 5 myńǵa jýyqtaıtyn Baqbaqty aýlyndaǵy saıabaqty otandyq zamanaýı qurylys materıaldaryn paıdalana otyryp salyp shyqqan. Ashylý saltanatyna turǵyndar tegis jıyldy. Igi sharaǵa arnaıy kelgen Balqash aýdanynyń ákimi Azat Qutpanbetov jıylǵan qaýymdy qýanyshtarymen quttyqtady.
«Aýyldyń ajaryn ashyp turǵan bul saıabaqtyń keleshekte gúlmen kómkerilip, tóńireginiń taza ári búlinbeı turýy – turǵyndarǵa tikeleı baılanysty. Týǵan aýlymyzdyń tazalyǵyn qadaǵalap, kózdiń qarashyǵyndaı saqtaýǵa árbirimiz jaýapty bolýǵa tıispiz. Sonda ǵana aýyl órkendep ósedi, kórkeıedi. Esigin aıqara ashqan saıabaqta balalarymyz alańsyz oınap, aqsaqaldarymyz bir-birimen qaýyshyp, qaýqyldasyp júrgenderiniń ózi qýanysh. Sol sebepti birligimiz ben tirligimiz úılesip, elimizdi kórkeıtýge úles qosa bereıik», dedi aýdan ákimi.
Jan jadyratar jaǵymdy jańalyqtyń basy-qasynan tabylǵan aýdannyń qurmetti azamattary, Baqbaqty aýyldyq ardagerler keńesiniń tóraǵasy Nurseıit Sarbasov, «Qurmet» ordeniniń ıegeri Saparǵalı Sátbaev, aýyldyq qoǵamdyq keńestiń tóraǵasy Sadyq Úrkimbaev, otbasy jáne áıelder uıymynyń tóraıymy Janymgúl Daýylbekova júrekjardy tilekterin bildirip, Baqbaqty aýlynyń jyldan-jylǵa kórkeıip kele jatqanyn, turǵyndardyń yntymaq pen birligi ózgege úlgi-ónege ekenin tilge tıek etti.
Aıtýly is-sharaǵa arnaıy qatysqan aýdan ónerpazdary ásem án áýeletip, kúı kúmbirletip, merekelik sharanyń mańyzyn arttyra tústi.
«Saıabaǵymyzdyń ashylǵany biz úshin zor qýanysh. Bala-shaǵamyz taza ári qaýipsiz alańda emin-erkin oınaıtyn boldy. Úlkenderdiń de úıden uzap, serýendeýine óte qolaıly bolǵanyna qýanyp jatyrmyn. Dárigerler taza aýada kóp júrý keregin aıtady. Endi emdelip shyqqan soń, saıabaqta emin-erkin serýendeıtin bolamyz», deıdi aýyl turǵyny Yrysjan.Janǵa jaıly saıabaqta balalardyń oıyn alańy men otyrýyna yńǵaıly oryndyqtar jasalǵan. Sondaı-aq túngi mezgilde munda jaryq shamdary jarqyrap, tóńirekke túgel sáýle shashyp turady.
Dál osyndaı ıgi is-shara Kegen aýdanynyń Jalaǵash aýlynda da jalǵasyn tapty. «Aýylym – altyn besigim, týǵan jer – ómirdiń qaınar bulaǵy» qorynyń uıymdastyrýymen aýyl jurtshylyǵy jumyla kirisip, saıaly saıabaqtyń ashylýyna muryndyq boldy. Jalpy, aýmaǵy bir shaqyrymǵa jýyqtaıtyn saıabaqta shyrsha, aqqaıyń, tal-terek pen sıren aǵashtary jaıqala ósken. Jalaǵash aýyldyq aqsaqaldar alqasynyń tóraǵasy Árip Sybanbaev jıylǵan qaýymǵa aq batasyn berip, ıgilikti bolýyna tilektestigin bildirse, aq jaýlyqty analar shashý shashyp, qýanyshtaryn eseledi.
«Kóp bolyp qolǵa alǵan istiń bitýine atsalysqan aýyldyń úlken-kishisine, el aǵalary men jastarǵa alǵysymyzdy bildiremiz. Osy kúni Kegen aýdanynda 34 eldi meken bolsa, Jalaǵash eń úlkeni ári úlgi bolarlyq aýyldar qatarynda. Jyl on eki aı «Kólsaı kólderine» aǵylatyn týrısterden damyl tappaıtyn aýyldyń ajarly bolýy – bárimizge syn. Sol sebepti qorshaǵan ortany, aýlymyzdy taza ustaýǵa barshamyz kóńil bólýimiz kerek», degen Kegen aýdany ákiminiń orynbasary Medet Isaev saıabaqtyń ashylýyna eleýli eńbek sińirgen bir top azamatty aýdan ákiminiń Alǵyshatymen marapattady.
Almaty oblysy