AQTAÝ. 26 sáýir. Mańǵystaýdaǵy ortalyqtan shalǵaıda jatqan zastavalar men teńizshi shekarashylar da daýys berdi. Bul týraly tumba.kz saıtyna silteme jasap, egemen.kz tilshisi habarlady.
Búgin tańerteń erte Aqtaý teńiz portyna kelip toqtaǵan «Saqshy» jáne «Taraz» kemelerinen birneshe kúnnen beri ashyq teńizde júrgen shekarashylar tústi. Kemede saılaý oryny joq bolǵandyqtan, olar portqa Qazaqstan Respýblıkasy Prezıdentiniń kezekten tys saılaýyna qatysyp, óz daýystaryn berý úshin arnaıy keldi. Kemege vahtalyq kezekshilerdi qaldyryp kelgen olar Jaǵalaý kúzeti aımaqtyq basqarmasynda daýys berse, Kaspıı teńiziniń soltústik aýmaǵynda kemelerde kezekshilik etip júrgender Baýtıno kentinde daýys beredi.
Jaǵalaý kúzeti aımaqtyq basqarmasynda ornalasqan 2 201 saılaý ýchaskesinde shekarashy áskerıler sappen kelip, áskerı tártippen tııanaqty túrde daýys berýde. «Áskerı tártippen saqadaı saı turyp, daýys bergen shekarashylardyń saılaý ýchaskesinde birde-bir zań buzýshylyq bolǵan joq», – deıdi baıqaýshy Sabyrjan Ábdıev.
Atalmysh ýchaskede Ulttyq qaýipsizdik komıteti shekara qyzmeti (UQK ShQ) «Batys» Jaǵalaý kúzeti aımaqtyq basqarmasynyń 2 500 shekarashylary daýys berse, Bóget, Ústirt syndy alys zastavalardaǵy áskerılerdiń daýys berýi úshin arnaıy tikushaqtar, al Qulaly múıisindegi áskerıler úshin katerler jiberildi.
«Olardyń barlyǵynda da «Saılaý týraly zańǵa» sáıkes, zańdylyqtar saqtalýy úshin saılaý komıssııasynyń ókilderi qatysýda», – deıdi UQK ShQ «Batys» Jaǵalaý kúzeti aımaqtyq basqarmasy basshysynyń orynbasary B.О́rnekeshov.
Aralarynda alǵash ret daýys berýshi matrostar men merzimdi áskerı qyzmetin óteýshiler bar shekarashylar úshin saılaý kúni birqatar sporttyq-merekelik sharalar uıymdastyrylady.
Gúlaıym Shyntemirqyzy.
Derek, sýret: tumba.kz.