Erkin kúresten elimizdiń áıelder quramasy halyqaralyq týrnırden oraldy. Ispanııanyń Madrıd qalasynda ótken Gran prı dodasynda tórt balýanǵa medal buıyrdy.
Irına Kazıýlına (65 kg), Jamıla Baqbergenova (72 kg), Elmıra Syzdyqova (76 kg) fınalda súrinip, kúmisti mise tutsa, Laýra Almaǵanbetova (57 kg) qola júldeni qanaǵat etti. Jámıla fınaldyq beldesýde amerıkalyq Kaıl Velkerge ese jiberdi. Tájirıbeli Elmıranyń kýbalyq Mılaımıs Marınge kúshi jetpedi. Áıelder quramasynyń bas bapkeri Qaırat Saǵadıev halyqaralyq týrnırge 55 kg salmaqta Zýlfııa Iаhıarovany, 59 kg salmaqta Dıana Kaıýmovany da qosqan edi, ekeýi de 5-orynmen shekteldi.
Áıelder kúresinen sportshylarymyz Parıj Olımpıadasyna barmaıdy. Qurlyqtyq, álemdik irikteý týrnırlerinde burymdy balýandarymyzǵa lısenzııa buıyrmady. 2016 jyly Rıo Olımpıadasynda Qaırat Saǵadıev baptaǵan balýan qyzdarymyz 1 kúmis, 2 qola medal oljalap, orasan nátıjemen oralǵan edi. Gúzel Manıýrova (75 kg) fınalda kanadalyq qarsylasyna ese jiberse, Elmıra Syzdyqova (69 kg) men Ekaterına Larıonova (63 kg) qola medalǵa qol jetkizgen.