Elden kórgen bir oqıǵa edi ǵoı bul. Aýyldan Qazalyǵa (Qyzylorda oblysynyń aýdan ortalyǵy) «Pazık» avtobýspen shoqytyp kelemiz. Qaı shopyr ekenin kim bilipti, áıteýir, aýdanǵa jaqyndaǵanda, balaly áıel qol kóterdi. Saldyr-gúldir etip biz de toqtaı qaldyq. Balasymen júgire jetken kelinshek «sálem berdikti» bir yzǵytty da, «Kármákistiń avtobýsy ma?» dep saldy. «Iá» destik. Aıtpaqshy, Kármákis – Karl Marks, qazirgi Bekarystan bı aýyly. Sodan álgi kelinshek sóıleı bastady.
– Aýyldan Nurgúl táte aqsha berip jiberý kerek edi...
– Qandaı Nurgúl?
– Sol sizdiń aýyldaǵy.
– Ol qaısysy taǵy? Kimniń qatyny?
Endi ana kelinshek sasty. Soǵan qaraǵanda qaıyn aǵa ne atasy bolý kerek. Dereý ulyna qarap:
– Tákónaı, aq kókeńniń atyn aıta qoıshy. 3-4 jastaǵy bala qapelimde ne aıtsyn? Kózi baǵjań etti de, jelbiregen tanaýyn bir tartyp qoıdy. Demek, aq kókesi – qaınaǵasy degen sóz.
– Áı, aıt!
Bala da umytqan bolý kerek. Yshqyryn bir kótergeni bolmasa, úndemedi. Endi avtobýstaǵylar shýlaı bastadyq.
– Áı, aıta bershi, atań bolsyn, qaınaǵań bolsyn...
– Sonsha kerilgeni nesi?
– Bol endi, ýaqyt sozbaı...
Náti myqty eken myna kelinniń. Aıtpady. Shofer qasarysyp ol tur.
– Kim ol?
Kelinshektiń murny tershı bastaǵan. Sonda da qaınaǵanyń atyn atamaı tur. Endi avtobýstyń ishindegi bir top qatyn jumbaqty tabýǵa kiristi. Anany aıtty, mynany aıtty.
– Tuqymyń kóbeıgir, Baýbektiń úıindegi me Nurgúliń?
– Iá, – dep qaldy qatty qýanǵan kelinshek.
– Baıǵus-aı, qaınaǵanyń atyn aıtpaımyn dep, aqshadan aıyryla jazdadyń-aý...
– О́ı, – dep bir shyrt túkirdi shopyr da. Aqshasyn berip, biz de jóneldik. Qaıyn jurtyn qadirleı biletin kelinniń qazaqta bolǵanyna shúkir dedik ishteı.