Almatydaǵy Dostyq úıinde memleket tutastyǵy men halqynyń birligin nasıhattaýǵa baǵyttalǵan dóńgelek ústel ótti. Saıası sarapshylar men QHA mádenı birlestikteriniń jetekshileri qatysqan basqosýda «Birligimiz – áralýandyqta» dep atalǵan jańa jobanyń tusaýy kesilip, aldaǵy maqsattary aıqyndaldy.
Eldegi beıbitshilik pen kelisim taqyrybyn, Qazaqstandy meken etken etnostardyń mádenı baılanystaryn nyǵaıtýǵa baǵyttalǵan bastamany qurý ıdeıasy Ulttyq quryltaıdyń úshinshi otyrysynda aıtylǵan ózekti oılardan týyndaǵan. Joba jetekshisi – Parlament Senatynyń depýtaty Nurııa Nııazova. Tutas el aýmaǵyn qamtıtyn joba birneshe baǵytta jumys istemek. Dálirek aıtqanda, mádenıet, óner, bilim salasyna qoldaý kórsetip, etnomádenı ortalyqtardyń rýhanı baılanysyn nyǵaıtýǵa baǵyttalǵan baıqaýlar uıymdastyrý, olardy ózara túsinistikke, ortaq birlikke tárbıeleıtin is-sharalarǵa bastamashy bolý kózdelgen. Jańadan qanat qaqqan joba keler jyldyń ortasyna deıin osy baǵytta 100-ge tarta is-shara uıymdastyrýdy josparlap otyr.
«Álem kún saıyn qubylyp jatqan kezeńde birlik pen yntymaq basty qundylyqtarymyzdyń biri ekenin túsinýge tıispiz. Ulttyq quryltaıda Prezıdent Qasym-Jomart Toqaev: «Biz «birligimiz – áralýandyqta» degen qaǵıdany berik ustanyp, elimizdegi beıbitshilik pen kelisimdi saqtaıtyn bolamyz», degen edi. Joba osy qaǵıdany júzege asyrý maqsatynda Qazaqstan halqy Assambleıasy Hatshylyǵynyń qoldaýymen qurylyp otyr. Joba negizinen Qazaqstandaǵy mádenıetterdiń ártúrliligin jáne mádenıetaralyq sımbıozdy kórsetýge baǵyttalǵan. Etnomádenı birlestikter, shyǵarmashylyq zııaly qaýym, qoǵam birliginiń faktory retinde Qazaqstan halqynyń mádenı áralýandyǵyn nasıhattap, halqymyzdyń mádenıetin, ádet-ǵurpyn, salt-dástúrin qurmettep, memlekettik tildi jetik bilip, Otanǵa degen súıispenshilik murattaryn nasıhattaýǵa úles qossa ıgi. QHA-nyń respýblıkalyq jáne óńirlik ókildikteri, Azamattyq alıans, jýrnalıster, blogerler, Mádenıet jáne aqparat, Bilim, Ǵylym jáne joǵary bilim mınıstrlikteri, Astana, Almaty, Shymkent qalalarynyń jáne oblystardyń ákimdikteri jobany qoldap otyr», deıdi Nurııa Nııazova.
Almaty qalasy Azamattyq alıansynyń tóraǵasy Qaıyrjan Ábdihalyqov joba aýdıtorııasy eresek adamdarmen qatar balalardy da qamtıtynyn atap ótti. Ol keler jylǵy QHA-nyń 30 jyldyǵyna deıin kóptegen mádenı, tarıhı festıvaldar uıymdastyra otyryp, jas jetkinshekterdi shabyttandyrý, ortalyq qalalardy ǵana emes, aımaqtar men túkpirdegi aýyldardyń turǵyndaryn da jobaǵa tartý kózdeletinin jetkizdi. «Respýblıka kúni qarsańynda Almaty qalasyndaǵy barlyq ózge elder konsýldyqtarynyń ókilderin otbasymen birge bir alańda jınaýdy josparlap otyrmyz. Olar jáne olardyń balalary memlekettiń yntymaq pen birlikke negizdelgen tyń bastamalarymen tanysyp, oń áser alady degen oıdamyz. Joba negizinen mádenı baǵyttardy qamtıtyndyqtan, teatrlar men óner oshaqtaryn qoldaý, uıǵyr, koreı teatrlaryndaǵy birlik taqyrybyn arqaý etken qoıylymdardy jetildirý, balalar men jastardy birlik uǵymyna tárbıeleıtin bastamalardy ilgeriletý mańyzdy», deıdi Qaıyrjan Ábdihalyqov.
Joba jetekshileriniń aıtýynsha, mádenı sabaqtastyqqa mańyz berýmen qatar bastamashy top qoǵamnyń san salasynda bolyp jatqan kúrmeýi kóp kúrdeli máselelerdiń túıinin tarqatýǵa atsalyspaq.
ALMATY