Astanada Ishki ister mınıstri polısııa general-leıtenanty Erjan Sádenovtyń tóraǵalyǵymen ózara is-qımyl jasaıtyn organdar basshylary men áskerlerdiń komandalyq quramynyń qatysýymen Ulttyq ulannyń Áskerı keńesi ótti, dep habarlaıdy Egemen.kz Ulttyq ulannyń baspasóz qyzmetine silteme jasap.
Áskerı keńes otyrysynyń kún tártibinde Ulttyq ulannyń 2024 jyldyń birinshi jartyjyldyǵyndaǵy qyzmettik-jaýyngerlik qyzmetiniń jaı-kúıi jáne jańadan qurylǵan bólimshelerdi jasaqtaý jónindegi jumystyń nátıjeleri týraly máseleler qaraldy.
Otyrysty ashqan quqyq qorǵaý vedomstvosynyń basshysy Qazaqstan Respýblıkasynyń Ulttyq ulany elimizdegi qoǵamdyq qaýipsizdik pen quqyqtyq tártipti qamtamasyz etýde sheshýshi ról atqaratynyn atap ótti.
Sonymen qatar mınıstr quqyqtyq tártip áskerlerimen baılanysty ózekti máselelerdi atap ótti. Atap aıtqanda, ofıserler men serjanttar quramynyń jeke quramymen jasaqtalmaý máselesi qozǵaldy.
«Árbir komandır bólimshelerdiń qyzmettik-jaýyngerlik qyzmetin qamtamasyz etý úshin bilikti kadrlardy irikteýmen aınalysýǵa tıis. Bas shtabqa, áskerı bólimderdiń komandırleri men orynbasarlaryna bos laýazymdardy shuǵyl túrde jasaqtaýdy tapsyramyn. Jeke quramǵa qyzmet úshin barlyq qajetti jaǵdaılardy jasaý qajet. Jergilikti atqarýshy organdarmen, Qorǵanys mınıstrliginiń Qorǵanys isteri jónindegi departamentterimen jáne bólimderimen birlesip osy baǵyttaǵy jumysty jandandyrý qajet», dedi IIM basshysy.
О́z kezeginde Ishki ister mınıstriniń orynbasary - Ulttyq ulannyń Bas qolbasshysy general-leıtenant Erkin Botaqanov birinshi jartyjyldyqta Ulttyq ulanǵa júktelgen barlyq mindetter tolyq kólemde oryndalǵanyn atap ótti. Quqyqtyq tártip áskerleriniń shtattaryna Aqtaý, Atyraý, Qyzylorda, Oral jáne Qostanaı qalalarynda jedel maqsattaǵy bes batalon engizildi. Mamyr aıynda el Prezıdenti - Qarýly Kúshterdiń Joǵarǵy Bas qolbasshysy Qasym-Jomart Toqaevtyń qatysýymen avıasııalyq bazanyń saltanatty ashylýy ótti. 3 myńnan astam áskerı qyzmetshi, 160-tan astam avtomobıl jáne arnaıy tehnıka, sondaı-aq 7 avıasııa birligi tabıǵı sıpattaǵy TJ rejımi jaǵdaıynda sý tasqynyn joıýǵa tartyldy. Jeke quramnyń jalpy kúshimen 4 myńnan astam adam, 600 tonna júk jáne 130 tonna gýmanıtarlyq kómek tasymaldandy, 5 myńnan astam azamat evakýasııalandy.
Otyrys barysynda quqyqtyq tártip áskerleriniń qyzmettik-jaýyngerlik qyzmetiniń qorytyndylary týraly 2024 jyldyń birinshi jartyjyldyǵynda Ulttyq ulan Bas qolbasshysynyń birinshi orynbasary – Bas shtab bastyǵy general-maıor Qaırat Aqtanov baıandama jasady.
Áskerlerdiń jedel qoldanýǵa daıyndyǵyn arttyrý maqsatynda áskerı qyzmetshiler seksennen astam birlesken oqý-jattyǵýlarǵa, onyń ishinde vedomstvoaralyq toptar quramyndaǵy daǵdarystyq jaǵdaılarǵa den qoıý jónindegi keshendi oqý-jattyǵýlarǵa qatysqany atap ótildi.
Quqyqtyq tártip áskerleriniń bólimsheleri ózara is-qımyl jasaıtyn organdarmen birlesip jyl basynda qoǵamdyq tártipti qorǵaýdy kúsheıtýge, tabıǵı sıpattaǵy tótenshe jaǵdaılardyń saldaryn joıýǵa qatysty.
Mindetterdiń úlken kólemin áskerler bólimsheleri qoǵamdyq tártipti qorǵaýdy qamtamasyz etý jáne eldegi jedel jaǵdaıdyń ózgerýine, onyń ishinde mańyzdy qoǵamdyq-saıası is-sharalardy ótkizý kezeńinde ýaqtyly den qoıý boıynsha oryndady. Atap aıtqanda, Shanhaı Yntymaqtastyq Uıymynyń (ShYU) halyqaralyq sammıtin ótkizý kezinde Qazaqstan Respýblıkasy Ulttyq ulanynyń jeke quramy Ishki ister organdarynyń qyzmetkerlerimen birlesip qala kóshelerinde táýlik boıy kezekshilik atqardy.
Patrýldik-bekettik qyzmettiń 2 myńnan astam mindeti oryndaldy, 7,5 myńnan astam quqyq buzýshy ustaldy jáne ishki ister organdaryna jetkizildi.
Eldiń qoǵamdyq qaýipsizdigin qamtamasyz etýge «Búrkit» arnaıy maqsattaǵy bólimsheleri eleýli úles qosady. Olardy damytý jáne jaýyngerlik múmkindikterdi arttyrý boıynsha jumystar júrgizilip jatyr.
Otyrysta óńirlik qolbasshylyqtar qolbasshylarynyń «Baǵynysty áskerı bólimder men bólimshelerdegi qyzmettik-jaýyngerlik qyzmetti uıymdastyrý jónindegi isterdiń jaǵdaıy týraly» taqyrybyndaǵy esepteri, sondaı-aq Ulttyq ulan Bas qolbasshysynyń TjÁQJ jónindegi orynbasary general-maıor Qaırat Úmbetovtyń «1 jartyjyldyqtaǵy áskerlerdegi áskerı tártiptiń, zańdylyq pen quqyqtyq tártiptiń jaı-kúıi týraly» taqyrybyndaǵy baıandamasy tyńdaldy. Budan bólek kadrlar jáne áskerı bilim basqarmasynyń bastyǵy general-maıor Nurbol Mirtaevtyń «Jańadan engizilgen bólimshelerdi jınaqtaý jónindegi jumystyń nátıjeleri týraly» baıandama jasady.
Aıta keteıik, áskerı keńes otyrysyn qorytyndylaı kele, Ishki ister mınıstri áskerdiń jaýyngerlik daıyndyǵy men jaýyngerlik qabiletine erekshe nazar aýdardy.
«Áskerlerdi daıarlaý - bul jeke quram arasyndaǵy áskerı tártipke negizdelgen jaýyngerlik ázirliktiń negizi. Sondyqtan bólimshe komandırinen bastap ásker qolbasshysyna deıin barlyǵy áskerı qyzmetshilerdi tárbıeleýmen, moraldyq-psıhologııalyq jaı – kúıimen aınalysyp, áskerı qyzmettiń tartymdylyǵy men bedelin arttyrýy tıis», dep túıindedi polısııa general-leıtenanty Erjan Sádenov.
Áskerı keńes otyrysynyń qorytyndysy boıynsha basshylyq etý jáne oryndaý úshin óńirlik qolbasshylyqtar men áskerı bólimderge jiberiletin qaýly qabyldandy.
Sóz sońynda mınıstr ofıserler men komandırlerge jaýyngerlik qyzmetti joǵary rýhta jalǵastyrý keregin aıtty. Sondaı-aq olarǵa myqty densaýlyq, otbasylaryna amandyq pen jaýyngerlik qyzmette tabys tiledi.