«Ýaqytty keri qaıtarý» petısııasyn qaraý boıynsha qurylǵan jumys tobynyń ekinshi qoǵamdyq tyńdaýy ótti. Saýda jáne ıntegrasııa mınıstrliginde sarapshylar petısııa avtory tarapynan qoıylǵan energııa tutyný men shyǵyndardyń ósýi, ýaqyt aýystyrýdyń densaýlyqqa áseri, JKO sanynyń kóbeıýi syndy suraqtarǵa jaýap berdi, dep jazady Egemen.kz.
Talqylaýǵa Parlament depýtattary, petısııanyń bastamashysy, qoǵamdyq birlestikter men saraptamalyq qaýymdastyq ókilderi, densaýlyq saqtaý, energetıka, aýyl sharýashylyǵy, kólik, tótenshe jaǵdaılar, eńbek jáne áleýmettik qorǵaý, saýda jáne ıntegrasııa mınıstrlikteri men basqa da memlekettik organdar qatysty.
Petısııa avtorynyń birinshi talqylaý otyrysynda joldaǵan saýaldaryna sala mamandary jaýap berdi.
Sondaı mańyzdy taqyryptyń biri - «Biryńǵaı ýaqyt beldeýi: Jol apatynyń kóbeıýine áser etti me?»
Ishki ister mınıstrliginiń departament bastyǵynyń orynbasary Qaırat Raýshanovtyń aıtýynsha, ýaqyt ózgerisi jol-kólik oqıǵasyna aıtarlyqtaı áser etpegen.
«Sońǵy úsh jylda jol-kólik oqıǵalarynyń sany birshama ósken. Taldaý kórsetkendeı, biryńǵaı ýaqyt beldeýine kóshý JKO dınamıkasyna aıtarlyqtaı áser etpedi. JKO-nyń negizgi sebepteri – jol júrý erejelerin buzý, joldardyń jaǵdaıy, kólik quraldarynyń tehnıkalyq jaǵdaıy, aýa raıy jaǵdaılary jáne adamı faktor. 2024 jyldyń alǵashqy alty aıynda kámeletke tolmaǵandar arasyndaǵy qylmystardyń azaıýy tirkeldi», dedi ol.