PETROPAVL. 27 sáýir. Petropavlda saılaýshylardyń daýys berý úderisi úzdiksiz qadaǵalandy. Mundaı derekti qoǵamdyq baıqaýshylardyń biri Ásel Saparǵalı aıtyp berdi. Bul týraly egemen.kz tilshisi habarlady.
«Shyny kerek, mundaı asa mańyzdy saıası sharaǵa baıqaýshy retinde birinshi ret qatysqandyqtan, qatty qobaljydym. Biraq aldyn ala tııanaqty ázirlikterdiń júrgizilýi kóńildegi kúdikti seıiltip, senimimdi kúsheıtti. Saılaýǵa baqylaý jasaý jónindegi respýblıkalyq qoǵamdyq komıssııasy oblystyq fılıalynyń tóraǵasy Sergeı Hýdıakov árqaısymyzben jeke sóılesip, naqty baǵyt-baǵdar berdi», – deıdi elimizdegi eń mańyzdy saıası naýqandy qadaǵalaǵan jas maman.
Saılaýǵa daıyndyq jumystarynyń joǵary deńgeıde ótkenin aıtqan ol semınar-trenıngterdiń paıdasy mol bolǵanyna toqtaldy. «Daıyndyq kezinde teorııalyq bilimimizdi nyǵaıttyq, tájirıbemizdi baıyttyq. Saılaýaldy máselelerge jan-jaqty qanyqtyq. Qolymyzǵa ádistemelik materıaldar, kómekshi quraldar berilip, zańnamalyq normalardyń qatań saqtalýyna basa nazar aýdaryldy. Qazir oı eleginen ótkizip otyrsam, «kóz – qorqaq, qol – batyr» degendeı, bári de adamnyń jeke jigerine, qoǵamdyq belsendiligine baılanysty eken. Maǵan tańdaý túskende, birden kelisimimdi berdim. О́ıtkeni, biz, jastar, qolymyzdan is keletinin, kez kelgen saıası sharalardy zańdy túrde júzege asyra alatynymyzdy dáleldeı bildik. Adamnyń bolashaqtaǵy maqsaty men kásibı biliktiligi osyndaı naqty jaǵdaılarmen ólshense kerek», – degen Ásel qoǵamdyq baıqaýshy mártebesin ıelengenine esh ókinbeıtinin aıtty.
«Meniń kúni boıǵy mindetim №635 saılaý ýchaskesinde basqa da qoǵamdyq uıym ókilderimen birlese otyryp, olqylyqtardyń oryn almaýyn qadaǵalaý boldy. Barlyq úderister zańǵa sáıkes atqarylyp, saılaýshylar tarapynan birde-bir renish aıtylǵan joq. Halyqaralyq baıqaýshylar da jalpyǵa ortaq demokratııalyq talaptardyń saqtalǵanyn jetkizdi. Olardyń keıbiri Qazaqstandaǵy saılaý shet elderdi qyzyqtyryp otyrǵanyn jasyrmady. Bizdiń oı-pikirlerimiz de osyǵan saıady. Sebebi, saıası naýqandy uıymdastyrýshylardyń tynymsyz tirligi, jumystardyń júıeliligi, aqparattandyrý qyzmetteriniń jedeldigi, sondaı-aq, elektorattyń joǵary belsendiligi tánti etti», – deıdi baıqaýshy.
Qoıylǵan talaptardyń arqasynda ózderine júktelgen mindetterdi barynsha jaýapkershilikpen atqarýǵa tyrysqan baıqaýshylar saılaý ýchaskeleri ashylǵan kezden bastap jabylǵanǵa deıin saılaý úderisterin úzbeı qadaǵalap otyrdy.
«Saıası naýqannyń ashyq ótýine basymdyq berildi. Saılaýdyń óz dárejesinde uıymdastyrylýyna úles qosqanymdy demokratııalyq qadamdy tereńdetýdiń biri kórinisi retinde baǵalaımyn», – deıdi saılaýdyń ádil ótýine ózindik úlesin qosqan jas baıqaýshy.
О́mir Esqalı.
Derek, sýret: egemen.kz.