Prezıdent Is basqarmasy janyndaǵy Parlamentarızm ınstıtýty men «Amanat» partııasy daıyndaǵan otandyq azyq-túlik óndirisin qorǵaýǵa arnalǵan «Saýda qyzmetin retteý máselesi boıynsha keıbir zańnamalyq aktilerge ózgeris pen tolyqtyrý engizý týraly» zań jobasyn talqylaý aıaqtaldy. Qujat mátini bıznes jáne memlekettik organ ókilderiniń jumys tobynyń otyrystarynda jan-jaqty talqylandy. Reglamentke sáıkes zań jobasy Úkimet qorytyndysyn alýǵa jiberildi.
Otandyq azyq-túlik óndirýshiler saýda oryndarynan únemi teperish kórip, memlekettik organdardyń qoldaýyna muqtaj bolyp júretin. Eki jylǵa jýyq ýaqyttan beri osy máseleni kóterip, ishki naryqta otandyq óndirýshini qoldap, qorǵaıtyn zań kerek ekenin aıtyp keldi. Zań daıyn boldy. Endi Saýda jáne ıntegrasııa, Densaýlyq saqtaý, Ulttyq ekonomıka, sondaı-aq Aýyl sharýashylyǵy mınıstrligi zań jobasyndaǵy usynystardy taldap, óz baǵasyn berýge tıis.
«Azyq-túlik óndirýshiler úshin bul zań óte mańyzdy. Búginde barlyq otandyq tutynýshyǵa eldegi dúkenderde ımporttyq azyq-túlik ónimderi basym ekeni anyq. Bul rette ımporttyq azyq-túlik pen otandyq azyq-túlik arasyndaǵy básekelestik kóp sebepke baılanysty múldem ádiletsiz. Sondyqtan naryqtaǵy qatynastardy retteý, eldegi saýda jelilerindegi ónimderdi satý úderisin adal jáne ádil etý qajet. Zań jobasynyń erejeleri dál osyǵan baǵyttalǵan. Biz beıindi mınıstrlikterdiń, jalpy Úkimettiń qoldaýyna úmit artamyz. Zań jobasy oń qorytyndy alyp, kúzde depýtattardyń kásibı talqylaýy úshin Parlament Májilisine túsedi dep senemiz», dedi «Qazaqstan sút odaǵynyń» dırektory Vladımır Kojevnıkov.
«Qazaqstan et óńdeý kásiporyndary qaýymdastyǵy» atqarýshy dırektorynyń orynbasary Iýlııa Namnyń aıtýynsha, otandyq óndirýshiler ımporttyq ónimdermen sapasy men assortımenti boıynsha erkin básekege túse alady.
«Biraq baǵa boıynsha utylamyz. О́ıtkeni oǵan bizge táýeldi emes kóptegen faktor áser etedi. Eń birinshi, otandyq azyq-túliktiń ishki naryqtaǵy saýda sórelerine qoljetkizý faktory tur. О́ndirýshiniń saýda jelilerine syıaqysy, qyzmeti úshin tólem, «retrobonýstar» dep te atalatyn syıaqysy bar. Munyń bári otandyq azyq-túlik óndirýshi úshin qıyn másele. Bul máseleni naqty retteý kerek. Bıznes sýbektileri saýdamen qarym-qatynasyn tepe-teń negizde qurýy úshin saýda ústemesinen basqa barlyq alym men tólemdi alyp tastaýy kerek. Saýda kompanııalary otandyq óndirýshini shyǵyny jabylatyn saýda ústemesi mólsherinde shektemeý kerek. Biraq syıaqynyń basqa túrlerine tyıym salý kerek. Dál osy tásil zań jobasyna engizilgen jáne búgingi tańda memlekettik qurylym ókilderiniń otandyq óndirýshige qulaq salyp, ulttyq ekonomıkalyq múddeni qorǵaýy biz úshin óte mańyzdy», dedi Iý.Nam.
Zań jobasyn daıyndaýda jumys tobyna jetekshilik etken Májilis depýtaty, Agrarlyq máseleler jónindegi komıtet múshesi Nurjan Áshimbetov jańa zań aldyn ala talqylaýdyń qıyn kezeńinen ótkenin aıtty.
«Importtalǵan azyq-túlik ónimderiniń saýda sórelerinde alatyn orny artyp keledi. О́ıtkeni saýda kompanııalaryna olarmen jumys isteý tıimdirek. Otandyq óndirýshi kóbine tysqary qalady nemese salystyrýǵa kelmeıtin shyǵyndy kóterýge májbúr bolady. Mundaı jaǵdaı eldiń ulttyq ekonomıkasynyń múddesine saı kelmeıtini anyq. Sondyqtan ony túzetýge tıispiz. Ishki naryqty qorǵaýdyń barlyq tetigin paıdalaný qajet. Prezıdent ekonomıkada proteksıonıstik tásilderdi engizý mindetin qoıyp otyr. Bizdiń oıymyzsha, otandyq óndirýshiler saýdada basymdyqqa ıe bolýy shart. Bul memleket múddesi úshin kerek. Otandyq taýarlardyń kepildi kólemi bar arnaıy sóreler, saýda zalyndaǵy eń jaqsy oryndar, jergilikti óndirýshiler kúni, túrli aksııa, dám tatý, merekeler uıymdastyryp otyrý qajet», dedi N.Áshimbetov.
Úkimettiń oń qorytyndysyn alǵan jaǵdaıda zań jobasy aldaǵy kúzde talqylaý úshin jáne daýys berý úshin Májiliske jiberiledi.