IELTS halyqaralyq sertıfıkatynyń baldaryn UBT baldaryna aýystyrý jáne UBT nátıjesin esepke ala otyryp, taǵy bir túlek eń joǵary ball aldy, dep habarlaıdy Egemen.kz.
Ol Aqmola oblysyna qarasty Qosshy qalasynyń túlegi Aıym Erjanova.
Ǵylym jáne joǵary bilim mınıstrliginiń málimetinde: «UBT-ny tórt pán boıynsha tapsyryp, 90 ball jınady. Sonymen qatar ol «Aǵylshyn tili» páni boıynsha baldardy aýystyrý úshin IELTS halyqaralyq sertıfıkatyn usyndy. Erejelerge sáıkes, IELTS baldaryn UBT baldaryna aýystyrý bilim berý granttaryn taǵaıyndaý konkýrsyna ótinish berip, sertıfıkattyń rastyǵy anyqtalǵan soń JOO-nyń qabyldaý komıssııasy arqyly júzege asyrylady. Osylaısha qazirgi ýaqytta Aıym Erjanova 140 baldyń ekinshi ıegeri atandy jáne konkýrsqa eń joǵary balmen qatysady», delingen.
Sonymen qatar, IELTS halyqaralyq sertıfıkatyndaǵy baldardy aýystyrýdy esepke alǵanda Mardan Kúnshyǵarov (Qosshy qalasy) 139 ball ıelendi.