QOSTANAI. 22 qańtar. Qostanaıda skrınıng baǵdalamasy arqasynda qan aınalý júıesi aýrýlarynyń anyqtalýy 7,6 paıyzǵa artqan. Bul týraly egemen.kz tilshisi habarlady.
Qostanaıda ashylǵan baspasóz klýbynyń qonaǵy bul joly oblystyq densaýlyq saqtaý basqarmasynyń basshysy Oral Bekmaǵanbetov boldy. Ol ózimen birge orynbasarlaryn jáne oblys ortalyǵyndaǵy emdeý oryndarynyń bas dárigerlerin erte kelipti.
Aldyńǵy jylmen salystyrǵanda byltyr aýrýdan bolatyn ólim-jitimder azaıǵan. Onkologııalyq patologııadan bolatyn ólim-jitim 6, qurt aýrýdan bolatyn ólim 26, qan aınalym júıesinen bolatyn ólim-jitim 24 paıyzǵa tómendegen. Oblysta bir ana ólimi tirkeldi.
Oblysta skrınıng 11 baǵdarlama boıynsha júrgizildi. Onda 12 387 naýqas anyqtalǵan. Oblystyq densaýlyq saqtaý basqarmasynyn basshysy Oral Bekmaǵanbetovtyń aıtýynsha, skrınıng sharasynyń adam ómirine qateri asa kóp onkologııalyq jáne qan aınalym júıesi aýrýlarynyń alǵashqy satysynda anyqtaýǵa mańyzy zor. Qan aınalym júıesi aýrýynan zardap shegetinder sany 2013 jyly 14-15 paıyzǵa ósse, 2014 jyly skrınıngtiń arqasynda olardy ýaqyty anyqtap, naqty em qabyldaǵandar 4,5 paıyz boldy.
Brıfıngte oblys boıynsha dárigerlerdiń álde de jetimsizdigi áńgime boldy. Oblysta búginde 1 880 dáriger qyzmet etedi. 280 dáriger jetispeıdi. Ásirese, Jangeldın, Amangeldi sekildi alys aýdandarǵa jas mamandar barmaıdy. Osy oraıda, Oral Aıtbaıuly bıyl túlektermen áńgimelesý úshin medısınalyq joǵary oqý oryndaryna bas dárigerlerdiń baratyndyǵyn eske saldy. Oblystan medısına akademııalarynda 160 stýdent oqıdy. Bul óte az. Sonymen qatar, oblysqa bilikti dárigerlerdi Reseıden jáne Ýkraınadan shaqyrýdy da oılastyryp otyrǵanyn aıtty. Oral Bekmaǵanbetov: «Bizdiń dárigerlerdiń ortasha jalaqysy 160 myń teńgeni quraıdy. Bul az emes. Nesi bar, Reseıden, Ýkraınadan bilikti dárigerler kelsin, bizdegi áleýmettik jaǵdaı da, jalaqy da olarǵa unamaıdy dep oılamaımyn. Al bizge dáriger kerek», dedi.
Názıra Járimbetova.
Derek, sýret: egemen.kz.