Tartylǵan qarjylandyrýdyń nátıjesinde Otbasy bank («Báıterek» holdınginiń enshiles uıymy) «Naýryz» baǵdarlamasy boıynsha alǵashqy 60 zaem berdi, dep habarlaıdy Egemen.kz.
Qazir qonys toıyn atap ótýge Astana, Semeı, Shymkent, Almaty, Aqtóbe, Taraz jáne taǵy basqa óńir turǵyndary daıyndalyp jatyr. Olardyń barlyǵy jýyrda ǵana «Naýryz» baǵdarlamasy boıynsha zaem aldy. Bıylǵy 24 shildede KASE-de banktiń áleýmettik oblıgasııalarynyń eki shyǵarylymyn ornalastyrý boıynsha mamandandyrylǵan saýda-sattyq ótti, nátıjesinde nesıelendirýge 170,5 mlrd teńge qarajat tartyldy.
Bir oblıgasııanyń nomınaldy quny – 1000 teńge. Bul rette tartylǵan qarajat mólsherlemesi saýda-sattyqty ótkizý qorytyndysy boıynsha aıqyndaldy jáne 14,25% qurady. Oblıgasııalardyń aınalym merzimi - 5 jyl. Kýpondy tóleý kezeńdiligi – jylyna 2 ret.
Bank oblıgasııalaryn satyp alýdyń artyqshylyǵy – bul kýpondyq syıaqy úshin salyqtyń salynbaýy, sebebi Otbasy bank QR qarjy agenttikteriniń tizbesine kiredi, sondaı-aq atalmysh oblıgasııalardyń KASE-niń «resmı» tizimine engizilýine baılanysty.
Budan basqa, oblıgasııalar REPO emıtenttiń memlekettik qatysý úlesi bar oblıgasııalary qorjynyna engiziletin bolady jáne olar boıynsha market-meıkerdiń bolýy boljanady.
Saýda-sattyqqa ınvestorlardyń keń aýqymy – ekinshi deńgeıli bankter, saqtandyrý kompanııalary, brokerlik uıymdar men ınstıtýsıonaldyq ınvestorlar qatysty.
«Otbasy bankiniń oblıgasııalary – áleýmettik oblıgasııalar mártebesine ıe. Bul qosymsha opsııa olardyń ıelerine ESG damý saıasatyn júzege asyrý aıasynda aıtarlyqtaı artyqshylyq beredi. Sondaı-aq qor bırjasynda bizdiń oblıgasııalardy satyp alǵan ınvestorlar is júzinde «Naýryz» baǵdarlamasynyń qatysýshylary boldy. Olar erekshe muqtaj azamattardyń sanattaryna qoljetimdi nesıe berý úshin qarajat túrinde qorlandyrý jasady degen sóz. Men seriktesterimizge qosqan bul úlesteri úshin alǵys aıtamyn. Olardyń qoldaýlarynyń arqasynda bıyl 12 500 Qazaqstan azamattary qonys toıyn atap ótedi», dedi Otbasy bankiniń basqarma tóraǵasy Lázzat Ibragımova.
Gúlmıra Nurpeıisova «Naýryz» baǵdarlamasy boıynsha elimizde birinshi bolyp nesıe alyp, óz páteriniń kiltine qol jetkizdi. Ol Abaı aýdany aýdandyq aýrýhanasynda jumys isteıdi. Kúıeýimen birge 4 bala tárbıelep otyr. Kópbalaly otbasy osyǵan deıin aýyldaǵy ata-anasynyń úıinde turyp kelgen. Baǵdarlama qatysýshy Semeıde eki bólmeli, árlengen páter satyp aldy. Kóp balaly ana retinde ol zaemdy jyldyq 7% mólsherlememen rásimdedi (JTSM 7,3%-dan 8,9%-ǵa deıin).
«Biz sııaqty úlken otbasyǵa árıne jeke baspana qajet. 2016 jyly Otbasy bankinde depozıt ashtym jáne oǵan birigip qarajat jınaı bastadyq. Salymym tezirek ósýi úshin jalaqy alǵan kezde aqsham birden banktegi depozıtime aýdarylatyndaı etip avtotólem qyzmetin ornatyp qoıdym. Nátıjesinde sol jınaqtalǵan qarajatym, sondaı-aq otbasymnyń úlken quramy maǵan «Naýryz» baǵdarlamasy qatysýshylarynyń tizimine enýge kómektesti», dep Gúlmıra Nurpeıisova óz qýanyshymen bólisti.
«Naýryz» baǵdarlamasyna qatysýshylar tizimine engen barlyq 12 500 Qazaqstan azamattary qazirgi ýaqytta tólem qabilettiligin tekserip jatyr.