Parıjde alaýy tutanǵan Olımpııa oıyndarynyń alǵashqy kúnderi qorjynymyzǵa 1 altyn men 2 qola medal túskende qazaq jankúıerleri qýanysh pen shattyqqa bólendi. Barlyǵymyz arqa-jarqa bolyp qalǵan edik. Al osy aptanyń basy biz úshin kóńilsizdeý bastaldy. Dúısenbi kúni jerlesterimiz birde-bir júldege qol jetkize almady.
Danııar daralana almady
Dúısenbide jalǵyz dzıýdoshymyz jarys jolyna shyqty. 73 kg salmaq dárejesinde beldesken Danııar Shamshaevqa zor senim arttyq. Áli esimizde, 2022 jyly Astanada ótken Azııa chempıonatynda 20 jastaǵy jas jolbarysqa bas júldeni oljalaý úshin nebári 149 sekýnd jetkilikti bolǵany. Atap aıtsaq, Danııar úndistandyq Sýresh Sıngh Nınghoýjam men tájikstandyq Behrýz Qojazojdany 42 sekýnd, ózbekstandyq Muratjon Iýldashevty 31 sekýnd, qyrǵyzstandyq Shyńǵyshan Saǵynalıevti 34 sekýndta eńserdi. Sol kezde barlyq BAQ ókilderi 20 jasar órenniń asqan sheberligine tánti bolyp, bul jigittiń eptiligi men erligi jóninde jarysa jazǵan edi.
Sodan beri eki jyl da zymyrap óte shyqty. Elimizdiń birinshi nómirli balýany retinde Shamshaev talaı dúbirli dodaǵa qatysty. Birde utty, birde utyldy. Biraq álem chempıonaty men Azııa oıyndary sekildi baıraqty básekelerde onyń baǵy bir janbady. Bıyl Parıj Olımpıadasynyń tusaýkeser kezdesýinde Danııardyń Muratjon Iýldashevpen kúsh synasatynyn estigende qatty qýandyq. Dál sol balýandy Astanada jarty mınýtta jaıpap salǵany týraly joǵaryda aıttyq. Sol eki jyl aralyǵynda ózbek dzıýdoshysynyń sheberligi qatty ósti me, álde qazaq jigiti turalap qaldy ma, áıteýir, bul joly qandasymyz el senimin aqtamady. Muratjonǵa qarsy báseke barysynda úsh «shıdo» alǵan Shamshaev jarystan shettetildi.
73 kg salmaqta dúnıejúzilik reıtıngte birinshi orynda turǵan Hıdaıat Geıdarovtyń asyǵy alshysynan tústi. Jarys barysynda Tohar Býtbýl (Izraıl), Artýr Margelıdon (Kanada), Akıl Gıakova (Kosovo) jáne Joan-Benjamen Gabany (Fransııa) jolynan yǵystyrǵan Ázerbaıjan balýany Olımpıada chempıony atandy. Bul balýanǵa beker toqtalyp otyrǵan joqpyz. Hıdaıat bizge bóten emes. Ol 1997 jyly Qaraǵandyda dúnıege kelgen. Qazaq jerinde kindik qany tamyp, osy jaqtyń aýasymen tynystap, nárin boıyna sińirdi. Balaýsa shaǵynda ata-anasymen birge tarıhı otanyna oraldy. Mine, sol Geıdarov araǵa jyldar salyp, Ázerbaıjannyń bas balýanyna aınaldy. Atap aıtsaq, álem chempıony (2024 jyly) jáne sol jarystyń úsh dúrkin qola júldegeri (2018, 2019, 2022) atandy. Eýropa chempıonatyn tórt márte (2017, 2022, 2023, 2024) utyp, bir ret kúmispen (2018) kúpteldi. Eýropa oıyndarynda qola (2019), Dúnıejúzilik ýnıversıadanyń kúmis medalin (2019) enshiledi. Islam yntymaqtastyǵy oıyndarynda (2017) bas júldeni qanjyǵasyna baılady. Al 27 shildede 27 jasqa tolǵan Hıdaıat Geıdarov óziniń týǵan kúnine keremet syı jasap, Fransııanyń bas shaharynda «máńgi tozbas» ataqqa qol jetkizdi. Moldovanyń týy astynda óner kórsetken taǵy bir ázerbaıjandyq dzıýdoshy Ádil Osmanov pen japonııalyq Soıshı Hashımoto qola medaldy moınynda jarqyratty.
Áıelder 56 kg salmaqtyń júldelerin sarapqa saldy. Bul tartys Kanadanyń namysyn qorǵap júrgen japon qyzy Krısta Degýchıdiń jeńisimen aıaqtaldy. Álemdik reıtıngte kósh bastap turǵan ákki balýan fınalda Ońtústik Koreıanyń ókili Ha Mı-mıdi qapy qaldyrdy. Japonııalyq Harýka Fýnakýbo men fransııalyq Sara-Leonı Sızık úshinshi orynǵa taban tiredi.
Qamshybek te qapy qaldy
Bokstan Qazaqstannyń erler quramasy Parıjge tolyq qurammen barǵany belgili. «Shý» degennen 71 kg salmaqtaǵy Aslanbek Shymbergenov shyńnan qulaǵanda kóńilimiz qatty qulazydy. Sebebi ol – qatardaǵy kóp boksshynyń biri emes. Aslanbek – Olımpıadanyń ashylý saltanatynda qazaqtyń kók baıraǵyn ustap shyqqan eren tulǵa, ulttyq komandanyń kapıtany, álem jáne Azııa chempıony, Azııa oıyndarynyń eki dúrkin júldegeri. Parıj rınginde 30 jastaǵy saqa sportshy oıda-joqta Iordanııanyń ókili Zeııad Ishaıshke ese jiberdi. Dál sol bylǵary qolǵap sheberin Aslanbek buǵan deıin birneshe márte sabaǵan edi. Al óziniń sporttyq jolyndaǵy eń iri dodada qandasymyz jer sıpap qaldy.
О́zge boksshylarymyz jarysty jeńispen bastady. 63,5 kg salmaqtaǵy Muhamedsabyr Bazarbaıuly ıspanııalyq Oıer Ibarechcheni esh qınalmaı utty. 92 kg salmaqtaǵy Aıbek Oralbaı nıgerııalyq Oleten Olaoreni birinshi raýndta bir eseńgiretip aldy. Odan keıin de qarsylasyn jaqsylap turyp tómpeshtegen ol kúmánsiz jeńiske qol jetkizdi. 50 kg salmaqtaǵy Nazym Qyzaıbaı ıtalııalyq Djordana Sorrentınoǵa san soqtyrdy. Sol keshte sharshy alańǵa shyqqan Rýslan Abdollaevtyń da aıdarynan jel esti. О́zbekstannyń namysyn qorǵaǵan qazaq jigitiniń meksıkalyq Mıgel Anhel Martınesten mereıi ústem boldy.
Seısenbide Bazarbaıuly Olımpıadadaǵy óziniń ekinshi kezdesýin ótkizdi. Ol Azııa oıyndarynyń fınalısi, Azııa chempıonatynyń qola júldegeri taıpeılik Laı Chjýenmen qolǵap túıistirdi. Asa shıelenisti básekede Muhamedsabyr 3:2 esebimen jeńis toıyn toılady. Asa aýyr salmaqtaǵy Qamshybek Qońqabaev álem chempıonatynyń qola júldegeri, Eýropa chempıony, ıspanııalyq Aııýb Gadfa Drıssımen aıqasty. Pıreneı túbeginen kelgen boksshynyń boıy uzyn, ózi eńgezerdeı eken. Basqa alyp bara jatqan eshteńesi joq. Biraq Qamshybektiń soǵan da áli jetpedi. Táýekelge barmaı, jasqana qımyldap, qolyn ara-tura ǵana siltegen sańlaǵymyz aqyry san soǵyp qaldy. Bes tóreshiniń úsheýi Drıssıdi myqty dep tanydy. Al Tokıo Olımpıadasynda qola, álem chempıonatynda eki, Azııa oıyndarynda bir jáne qurlyq birinshiliginde tórt kúmis alǵan qazaqtyń nar tulǵaly boksshysy elge qurqol qaıtatyn boldy. О́kinishti-aq!
Tennısshiler tegis utylyp, mergender múlt ketti
Parıjge topyrlap barǵan tennısshilerimiz tegisteı utyldy. Aldymen jaraqatyn jeleý etken Elena Rybakına men Iýlııa Pýtınseva jarysqa qatysýdan bas tartsa, ózge oıynshylarymyz alǵashqy aınalymnan asa alǵan joq. Esesine ústel tennısinen ótip jatqan týrnırde Kırıll Gerasımenko tabysty óner kórsetip jatyr. Bastapqy básekede chılılik Nıkolas Býrgostan 4:0 (11:4, 11:5, 12:10, 11:6) esebimen basym túsken elimizdiń birinshi raketkasy ile-shala Germanııa qurama komandasynyń múshesi Sıý Dannan aılasyn asyrdy – 4:3 (6:11, 11:6, 11:13, 5:11, 11:5, 11:9, 11:6). 1/8 fınalda Kırıll mysyrlyq Omar Assarmen sheberlik baıqasady.
Al badmıntonshy Dmıtrıı Panarın Braın Iаnnnan (Kanada) jáne semserlesýshi Áıgerim Sarybaı Manon Brıýneden (Fransııa) utylyp, jarystyń ekinshi bóligine shyǵa almady. Onyń aldynda ǵana tájirıbeli noıandar – Rýslan Qurbanov, Vadım Sharlaımov, Elmır Álimjanov súringen edi. Nysana kózdeýden Nıkıta Chırıýkına men Irına Iýnýsmetova irikteý synynda 11-orynda qalyp qoıdy.
10 metrlik qashyqtyqtan pnevmatıkalyq myltyq atýda Aleksandra Le altynshy satyǵa jaıǵasty. Akademııalyq esýden Vladıslav Iаkovlev jartylaı fınalda birinshi oryndy ıelenip, E tobynyń fınalyna joldama aldy. Quramynda Ilfat Abdýllın, Aleksandr Eremenko jáne Dáýletkeldi Jańbyrbaı syndy mergenderi bar sadaq atýshylar 1/8 fınalda Italııa sportshylaryna 4:5 esebimen jol berdi.