Munaıly óńirdegi Inder, Isataı, Qurmanǵazy aýdanynda qaraqurt qaptady. Ýly jándiktiń zardaby turǵyndarǵa da, tórt túlikke de tıdi. Ásirese Inder aýdanyndaǵy О́rlik, Kóktoǵaı, Esbol jáne Eltaı aýylynda jıi baıqalǵan.
Reseıdiń Astrahan óńirimen shekaradaǵy Atyraý oblysynyń Qurmanǵazy aýdanynyń turǵyny qaraqurt shaqqanyn bilmeı qalǵan. Ony aman alyp qalý úshin Balqudyq aýylyndaǵy dárigerler Astrahan oblysynyń dárigerlerin shaqyrtýǵa májbúr boldy.
«Balqudyq aýylyndaǵy aýrýhana dárigerleri Harabaly aýdandyq aýrýhanasyna habarlasty. Ondaǵy emdeý mekemesine 1970 jyly týǵan jergilikti turǵyn jándiktiń shaǵýynan keıin toksıkalyq ýlanýmen túsken. Jergilikti turǵyndy qaraqurt shaqqany jóninde boljam jasalǵan. Er adamǵa shuǵyl mamandandyrylǵan medısınalyq kómek qajet boldy. Mundaı kómek kórsete alatyn Balqudyq aýylyna eń jaqyn ornalasqan medısınalyq mekeme – Harabaly aýdandyq aýrýhanasy. Balqudyq aýylyna reanımasııa brıgadasy attandy. Zardap shekken turǵyn aýdandyq aýrýhananyń jansaqtaý bólimine jedel jetkizildi», dep habarlady Astrahan oblysynyń densaýlyq saqtaý mınıstrligi.
Harabaly aýdandyq aýrýhanasynyń dárigerleri naýqasqa qajetti emniń bárin júrgizdi. Eki kúnnen keıin atyraýlyq naýqas jansaqtaý bóliminen palataǵa aýystyrylǵan. Qazir onyń ómirine tónip turǵan qaýip joq.
Atyraý oblystyq densaýlyq saqtaý basqarmasynyń baspasóz qyzmetinen málim etkendeı, oblystyq aýrýhanaǵa túsken 13 adamdy qaraqurt shaqqany anyqtalǵan. Naýqastardyń tórteýi aýrýhananyń jansaqtaý bólimine jatqyzylyp, tolyqtaı em-dom sharasyn alyp shyqqan. Al 9 adamǵa qaraqurtqa qarsy ekpe salynyp, ambýlatorlyq em alýǵa jiberildi. Oblystyq balalar aýrýhanasyna 3 bala tústi. Onyń ishinde 2 bala jansaqtaý bólimine jatqyzylyp, dárigerlerdiń baqylaýyna alynyp otyr. Bir balaǵa qaraqurtqa qarsy ekpe salynǵan.
«Aýdan ortalyqtarynda qaraqurt shaqqan úsh jaǵdaı anyqtaldy. Onyń bireýi – Inder, ekinshisi – Isataı, al úshinshi derek Qyzylqoǵa aýdanynda tirkeldi. Dárigerlerge júgingen pasıentterge alǵashqy ambýlatorlyq kómek kórsetildi», dep málimdedi basqarmanyń baspasóz qyzmetinen.
Oblystyq aýyl sharýashylyǵy jáne jer qatynastary basqarmasynyń resmı ókili Aqtilek Nurollaevanyń aıtýynsha, bıyl qaraqurt kóbeıip otyr. Ásirese turǵyndardyń ıeligindegi Oısylqara tuqymyna «jaýdaı» tıdi.
«Oblys aýmaǵynda maýsym-shilde aılarynda 485 túıeni qaraqurt shaqty. Sonyń saldarynan 90 túıe shyǵyn boldy. Sımptomatıkalyq emdeý sharalarynyń nátıjesinde 306 janýar saýyqty. Al 89 túıege áli de emdeý júrgizilip jatyr. Qaraqurt shaqqannan ólgen maldyń ıelerine 65 mln 211 myń teńge tólendi», dedi A.Nurollaeva. Onyń málimetine súıensek, ýly jándikterdiń shaǵýynyń aldyn alý, emdeý jáne ólgen janýarlarǵa ótemaqy tóleý bıýdjet qarjysy esebinen qarastyrylmaǵan. Alaıda soǵan qaramastan jergilikti veterınarlar ýly jándik shaqqan maldy emdeý sharalaryn kúndelikti júrgizip jatyr.
«Ýly jándikterdi joıýdy bıýdjet qarjysy esebinen atqarylatyn is-sharalar tizbesine qosý jóninde sharalar qabyldaý úshin Aýyl sharýashylyǵy mınıstrligine hat joldandy. Mal ıelerine ýly jándikter kóp taraǵan jaıylymda túıe, jylqy jáne sıyrdy jaıýdan bas tartýdy, aýrý belgileri bilingen janýarlar týraly jedel túrde veterınarlarǵa habarlaý, sondaı-aq emdeý sharalary júrgizilip jatqan janýarlardy kútip-baǵý erejelerin qatań saqtaý eskertildi», dedi A.Nurollaeva.
Atyraý oblysy