Qasym-Jomart Toqaev pen Denı Sassý-Ngesso eki eldiń resmı delegasııalarynyń qatysýymen keńeıtilgen quramda kelissóz júrgizdi, dep jazady Egemen.kz.
Memleket basshysy Kongo Prezıdentiniń qazaq jerine alǵashqy sapary eki el arasyndaǵy dıplomatııalyq qarym-qatynastyń 25 jyldyǵymen tuspa-tus kelip otyrǵanyn atap ótti.
«Biz Kongo Respýblıkasyn Afrıka qurlyǵyndaǵy mańyzdy seriktes retinde qarastyramyz. Eki el bir-birinen qashyqta ornalasqan. Soǵan qaramastan ózara baılanysty jan-jaqty damytýǵa múddelimiz. Qazaqstan men Kongo yntymaqtastyǵynyń áleýeti óte joǵary. Ásirese, saýda-ekonomıka, aýyl sharýashylyǵy, kólik-logıstıka, taý-ken, óndiris pen ınvestısııa, jańa tehnologııalar men ǵaryshty ıgerý baǵyttary boıynsha eki el arasyndaǵy yqpaldastyqty jandandyrý qajet. Búgingi qol qoıylatyn qujattar saıası jáne ekonomıkalyq yntymaqtastyqty damytýǵa tyń serpin beredi dep senemin. Osy nıetimizdiń aıǵaǵy retinde biz Kongoǵa Elshi taǵaıyndaımyz», dedi Prezıdent.
О́z kezeginde Denı Sassý-Ngesso Qasym-Jomart Toqaevtyń Kongoǵa dıplomatııalyq ókil taǵaıyndaý týraly sheshimi ózara yntymaqtastyqty nyǵaıta túsetinin aıtty.
«Shyn máninde, Sizdiń bul sheshimińiz Qazaqstan men Kongo arasyndaǵy ózara yqpaldastyqty damytýǵa degen umtylysyńyzdy anyq kórsetedi. Biz júzege asyrýǵa kelisken jobalar boıynsha eki el úkimetteri birqatar kelisim ázirledi. Munyń eki elge de paıdaly bolary sózsiz. Keıingi jyldary Qazaqstan damý jolynda zor tabysqa jetkenin atap ótkim keledi. Biz Sizdiń elińizben ekonomıkalyq yntymaqtastyqty nyǵaıtýǵa múddelimiz», dedi Kongo Prezıdenti.
Memleketter basshylary Qazaqstan-Kongo seriktestiginiń damý perspektıvalaryn talqylady. Atap aıtqanda, taraptar saýda-ekonomıka, energetıka, kólik-logıstıka, qarjy, sıfrlandyrý, taý-ken óndirisi jáne mádenı-gýmanıtarlyq salalardaǵy ózara yqpaldastyqty keńeıtý máselelerine aıryqsha nazar aýdardy.
Kelissóz sońynda Denı Sassý-Ngesso Qasym-Jomart Toqaevty Kongo eline saparmen kelýge shaqyrdy.