Premer-mınıstrdiń orynbasary Qanat Bozymbaev Aqtóbe oblysy Temir, Muǵaljar, Oıyl, Qobda, Yrgyz, Áıteke bı aýdandarynyń aýyldarynda boldy.
Aımaq sý tasqynynan eń kóp zardap shekkenderdiń biri sanalady, 1020 úı men saıajaı qurylysy apatty dep tanylǵan.
«Bizdiń aldymyzda 502 úı salý, 518 úı men páter satyp alý mindeti tur. Búgingi tańda 475 úı men páter satyp alyndy, jumystar 91,7%-ǵa oryndaldy. Tamyz aıynda 400-den astam úıdi kezeń-kezeńimen tapsyrý josparlanyp otyr. Qurylysta qoldanylatyn barlyq materıal Aqtóbe oblysynda shyǵarylǵanyn atap ótkim keledi. Qurylys materıaldary jetkilikti, tapshylyq joq», dedi óńir basshysy Ashat Shaharov.
Búginde Temir aýdanynyń Qumsaı aýlynda 21 úıdiń árleý jumystary júrgizilip, ınjenerlik ınfraqurylym tartylyp jatyr. Qurylysqa «BI Group» kompanııasy qarajat bóldi.
Muǵaljar aýdanynyń Jaǵabulaq jáne Birlik aýyldarynda «BI Group» kompanııasy esebinen salynǵan 14 úıdi paıdalanýǵa berýge daıyndap jatyr. Merdigerler ýchaskelerge ınjenerlik jelilerdi tartý jumystarymen aınalysyp jatyr. Jergilikti turǵyndardyń ótinishi boıynsha bul aýyldarda feldsherlik-akýsherlik pýnkt pen balabaqsha qurylysy bastalyp ketti.
Aýqymdy qurylys Oıyl aýdanynda júrgizilip jatyr. «Qamqor-Aqtóbe 2024» qory Qaratal aýlynda 128 úı jáne Oıyl aýlynda taǵy 21 úı salý jobasyn qarjylandyrǵan. Sondaı-aq Qaratal aýlynda bóget salynyp jatyr.
Qobda aýdanynyń Qobda aýlynda 130 otbasy jańa turǵyn úıge kóshedi. Qazir munda 10 merdiger uıym jumys istep jatyr. Barlyq 130 úıdiń qabyrǵalary qalanyp, shatyrlary jabylyp, ishki qurylys-montaj jumystary júrgizilip jatyr. Aýdanǵa Bolat О́temuratov qory qarjylaı kómek kórsetti. Jyl saıyn aýyldy sý basýyna jol bermeý maqsatynda jergilikti bılik ózen boıyndaǵy qorǵanys bógetterin kóteredi.
Yrǵyz aýdanynda «Qamqor-Aqtóbe 2024» qory esebinen Yrǵyz aýlynda 51 úı jáne Nura aýlynda taǵy 63 úı salynyp jatyr.
Aqtóbe oblysynda barlyǵy 50-den astam merdiger mekeme baspanalardy qalpyna keltirý jumystaryna jumyldyryldy. Qarqyndy arttyrý úshin vıse-premer Oıyl jáne Yrǵyz aýdandaryna jumys kúshin jáne qosymsha tehnıka tartýdy tapsyrdy.
«Úılerdiń 95%-y tamyz aıynyń sońyna deıin tapsyrylady. 15 qyrkúıekke deıin biz sý tasqynynan zardap shekkenderdiń barlyǵyn baspanamen qamtý mindetin qoıdyq. Qalǵan 5%-y Yrǵyz aýdany, onyń ishinde Nura aýlyna qatysty. Onda qurylys jumystary sý deńgeıiniń joǵary bolýyna baılanysty bir aıdan keıin bastaldy. Men qurylys brıgadalarynyń sanyn kóbeıtý týraly tapsyrma berdim. Sonymen qatar zardap shekken alty aýdanda joldar, ınjenerlik ınfraqurylym qalpyna keltiriledi. Yrǵyz aýdanynda aýyzsý jáne elektrmen qamtamasyz etý máselesi bar, bir aı ishinde ákimdik bul máseleni sheshýge tıis», dedi Qanat Bozymbaev.
Anyqtama: Aqtóbe oblysynda 4 521 otbasy jalpy somasy 1,6 mlrd teńgege 100 aılyq eseptik kórsetkish mólsherinde birjolǵy áleýmettik kómek aldy. 4 083 úıdiń materıaldyq múlkin óteý boıynsha 1,4 mlrd teńge somasyna tólem berildi.