«Qazaqstan» teleradıokorporasııasy Saıyn Muratbekovtiń «Jabaıy alma» povesiniń jelisimen alty bólimdi serıal daıyndap jatyr. Ekijyldyq jobanyń bıyl ssenarııi jazylyp, jazdyq sıýjetteri túsiriledi. Túsirilimniń basym jumystary qysta bolady. Telehıkaıa kelesi jyldyń mamyr aıynda efırge josparlanyp otyr.
Saıynnyń «Jabaıy almasy» kóp oqyrmanǵa tanys. Shyǵarmada surapyl soǵys jyldaryndaǵy tyldaǵy aýyr tirshilik qaz-qalpynda sýretteledi. Keıipkerler qandaı qıynshylyqtarǵa, taǵdyrdyń talqysyna tússe de, adamdyq beıneni, adamgershilik qasıetti joǵaltpaýǵa, ómirge degen úmitten túńilmeýge, taǵdyr taýqymetine moıymaýǵa, adaldyq pen ádildikti baıan etip, adal janyn, taza nıetin saqtaýǵa tyrysady.
Jańa jobanyń prodıýseri – Nazgúl Qarabalına, qoıýshy-rejısseri – Aıdyn Sahaman, ssenarıı avtory – Qanat Ramazan. Akterlik quramǵa kelsek, Qanatty – Zańǵar Mııatuly, Nazırany – Jánel Atambekova, Baǵılany – Nazgúl Qarabalına, Zıbash – Madına Kelgenbaı, Nursulýdy – Madına Qulseıitova, Búbinaıdy – Záýre Kópjasarova, Baıdalyny Omar Qıqym oınaıdy.
«Úlken shyǵarmany alty serııaǵa syıdyrý múmkin emes. Sondyqtan keı sıýjetterdi ssenarııde qamtı almadyq. Iаǵnı 70-80 paıyzy kitaptan alynsa, 20-30 paıyzy – ssenarıı avtorynyń eńbegi. Soǵys kezinde bolǵandyqtan oqıǵa ýaqytyn aýystyrýǵa týra keldi. Shyǵarmada kóp sıýjet jazda bolsa, serıalda qysta sýretteledi. Akterlik quram teatrlardan jınaqtaldy. Bári – elge belgili, tanylǵan óner adamdary. Sol kezdegi qazaq dalasyn túsirý, shynaıylyqtan alystamaý ońaı emes. Almaty mańyndaǵy Aqózek degen aýyl tańdap alyndy. Sýretshiler sol zamanǵa saı etip, dekorasııalaryn jasady, rekvızıtter izdep, kostıýmderdi laıyqtap tigý biraz ýaqyt pen kúsh-qýatty qajet etedi. Qazir jazǵy túsirilim jumystaryn aıaqtadyq. Eń negizgi qysta bolatyn túsirilimge daıyndalyp jatyrmyz», deıdi rejısser Aıdyn Sahaman.