Búgin elimizdiń 20 óńirinde bilim berý qyzmetkerleriniń tamyz keńesiniń óńirlik seksııalyq otyrystary bastaldy. Negizgi respýblıkalyq is-shara 21 tamyzda ótedi, dep habarlaıdy Egemen.kz.
Ustazdardyń tamyz keńesi bıyl alǵash ret halyqaralyq sammıt formatynda ótedi. Bul jolǵy jıynǵa bilim salasyndaǵy halyqaralyq sarapshylar qatysady. Osy jyly sammıt «Digital Kazakhstan: jańa zamandaǵy bilim berý» taqyrybyna arnalǵan.
«О́ńirlik konferensııalarda dástúrli plenarlyq otyrystar, ınteraktıvti paralleldi sessııalarmen qatar, «Sıfrlyq bilim berýdiń bolashaǵy» taqyrybynda kórmeler uıymdastyrylady jáne sıfrlandyrý salasyndaǵy jetekshi sarapshylardyń qatysýymen sheberlik sabaqtary ótedi», dedi Oqý-aǵartý mınıstrligi Orta bilim berý komıtetiniń tóraǵasy Qanybek Jumashev. Paneldik seksııalar men plenarly otyrystyń materıaldary barlyǵyna qoljetimdi bolýy úshin oblystyq basqarmalardyń saıtynda jáne áleýmettik jelilerde ornalastyrylady.
21 tamyzda ótetin pedagogterdiń respýblıkalyq tamyz sammıtiniń plenarlyq otyrysyna bilim salasyndaǵy halyqaralyq sarapshylar qatysady dep josparlanǵan. Oǵan onlaın rejımde 500 myńnan astam pedagogter qatysýǵa múmkindik alady.