ASTANA. 23 qańtar. Tennısten Avstralııa ashyq birinshiliginde synǵa túsken Zarına Dıas úshinshi aınalymda Marııa Sharapovaǵa 2:0 (6:1, 6:1) esebimen ese jiberdi. Bul týraly egemen.kz habarlady.
Alǵash bolyp dopty oıynǵa Zarına qosty. Tájirıbeli Sharapova salǵan betten bizdiń qyzdyń adymyn ashtyrmaı, tórt geım qatarynan upaı aldy. Tek, besinshi geımdi ǵana Zarına óz paıdasyna sheshe bildi. Artynsha qatarynan eki márte upaı alǵan reseılik tennısshi birinshi sette 6:1 esebimen jeńiske jetti.
Ekinshi kezeńdi Zarına jeńispen bastady. Qarsylasynyń dobyn óz paıdasyna sheshken qazaq qyzy oıynnyń qalǵan bóliginde bul qarqynyn joǵaltyp aldy. Nátıjesinde birinshi settegi jaǵdaı aına-qatesiz qaıtalanyp, Sharapova taǵy da 6:1 esebimen basym tústi.
Bul - álemniń 2-raketkasy, 27 jastaǵy Marııa Sharapova men Zarına Dıastyń kortta alǵash kezdesýleri. 21 jastaǵy bizdiń qyz ázirge WTA reıtınginde 31-satyda tur.
Zarına ótken jyly da Avstralııa ashyq birinshiliginde úshinshi aınalymǵa deıin jetken bolatyn. Atalmysh synda onyń jolyna rýmynııalyq tennısshi, búginde álemniń 3-raketkasy Sımona Halep tosqaýyl boldy.
Bıylǵy nátıjesinen keıin Zarınanyń álemdik reıtıngtegi orny ózgerip, bir-eki saty tómen túsýi múmkin. Desek te, otandyq tennıssúıer qaýymǵa tamasha kóńil-kúı syılaǵan qyzymyzdyń ýaqyt ótken saıyn sheberligi artyp keledi. Sondyqtan alda bolatyn jarystarda namysty qoldan bermeıdi dep senemiz.
Tórtinshi aınalymǵa shyqqan Sharapova atalmysh kezeńde qytaılyq Pen Shýaımen sheberlik baıqasady. Týrnırdiń 21-raketkasy sanalatyn qytaı qyzy da úshinshi aınalymda taǵy bir tennısshimiz Iаroslava Shvedovany jarys jolynan shyǵardy. Naqty aıtar bolsaq, P.Shýaı qazaqstandyqtan 2:0 (7:6 (9:7), 6:3) esebimen basym tústi.
Elaman Qońyr.
Derek: egemen.kz.
Sýret: ausopen.com.