Týrızm jáne sport mınıstrliginiń qoldaýymen Kazakh Tourism ulttyq kompanııasy áıgili ánshi Dımash Qudaıbergenmen birge elimizdiń týrıstik oryndarynda beınebaıan túsirýdi bastady, dep jazady Egemen.kz.
Beınebaıan Sharyn shatqaly, Kólsaı kólderi, Aqmeshit úńgiri, Áziret-Sultan qoryq-mýzeıi, sondaı-aq Bozjyra shatqaly, Torysh alqaby jáne taǵy da basqa elimizdegi tanymal týrıstik oryndarda túsirilgen. Sondaı-aq Týrızm jáne sport mınıstrligi jańa týyndyda Býrabaı, Qatonqaraǵaı, Altyn-Emel, Jońǵar-Alataýy memlekettik ulttyq parkteriniń keremet kórinisteri kórsetiletinin habarlady.
«Bul joba Qazaqstannyń biregeı sulýlyǵyna nazar aýdartyp qana qoımaı, kórermenderge óner týyndysy arqyly elimizdi jańa qyrynan kórsetýge jol ashady. Beınebaıan arqyly kórermender Qazaqstandy mádenı murasy baı, qaıtalanbas tabıǵaty bar erekshe meken retinde tanıdy dep úmittenemiz», dedi Týrızm jáne sport vıse-mınıstri Erjan Erkinbaev.
Joba Dımash Qudaıbergenniń jankúıerlerin elimizdiń tabıǵı jáne mádenı murasymen tanystyrýǵa, sol arqyly Qazaqstannyń týrızmin damytýǵa múmkindik beredi.
«Dımash – Qazaqstan týrızminiń elshisi atanýǵa laıyqty tulǵa. Kóptegen adam Qazaqstandy Dımash arqyly tanıdy», dep jazdy ánshiniń Qytaıdaǵy fanklýby.
Aıta keteıik, joba aıasynda tyńdarmandarǵa Qazaqstannyń tabıǵı jáne mádenı qazynalaryna arnalǵan jańa mýzykalyq kompozısııa da usynylady.