«Báıge berem jyǵylǵan balýanǵa da...»

Eki dzıýdoshy da Olımpıadaǵa deıin halyqaralyq saıystar­ǵa qatysyp, júldeli oralyp júrgen edi. Jattyqtyrýshysy Meıirjan Esmaǵambetovpen birge qarsylastarynyń osal tusyn zerttedi. Alaıda «Baq shaba ma, bap shaba ma?» degendeı, kil myqtylardyń báse­kesinde ekeýi de júlde al­ǵan joq. Álemdik dodada Ábı­ba Ábý­jaqynova besinshi oryn ıe­lense, Esmıgúl Kýıý­lova alǵash­qy beldesýinde qarsy­lasy­nan jeńilip qaldy. Keıin ekeýi de komandalyq saıysta qarsy­lasyna ese jiberdi.

«Olımpıadaǵa júlde alý úshin barǵan edim. Alaıda jeńi­lip qalǵanymdy moıyndaımyn. Jankúıerlerimniń úmitin aqtaı almaǵanyma ókinemin. Barlyq jankúıerimnen keshirim suraımyn. Aqtalatyn jónim joq. Altyn alý úshin barymdy sala kúreskenimmen, júldesiz qaldym. Qola medal úshin saıystaǵy qarsylasyma basymdyq tanyta almadym», dep kózine jas aldy Á.Ábýjaqynova.

Aqıyq aqyn Tólegen Aıber­genovtiń «Báıge berem jyǵylǵan palýanǵa da, Adaldyǵy sezilip turar bolsa...», dep jyrlaǵandaı, ásirese Ábıba Ábýjaqynovaǵa tosynsyı usynyp jatqandar az emes. Máselen, Májilis depýtaty Aıdarbek Hodjanazarov oǵan jańa kólik syılady.

«Túnimen dóńbekship uıyq­taı almadym. Oǵan sebep – Ábı­ba qaryndasymnyń kóz jasy. Bul – namystyń kóz jasy. Bul – tektiliktiń belgisi. Bul – úlken tárbıeniń úlgisi. Qys­qasy, Ábıbaǵa óz atymnan arnaıy syıaqy beremin. Parıjde Qazaqstannyń abyroıyn qorǵaı­myn dep baryn saldy. Jaraqat alsa da qaıtqan joq. Osyndaı eńbekti baǵalaý, osyndaı patrıot­tyqty nasıhattaý kerek», dedi Májilis depýtaty.

Atyraýlyqtar da dzıýdoshy arýlarǵa qurmet kórsetýden tys qalmady. Álemdik dodada el namysyn qorǵaǵan dzıýdoshy qyzdarǵa kólik syılap, qoldaý kórsetti. Oblys ákiminiń baspasóz hatshysy Rýslan Jumaǵazıevtiń aıtýynsha, «Zeekr» avtokóligi demeýshilerdiń qarjysyna alynǵan.

«Olımpıada – álemniń eń myqty sportshylary synǵa túsetin doda. Sol sebepten, bul saıysta top jarý ońaı emes. Osy turǵydan aıtqanda, atyraýlyq dzıýdoshylarǵa kiná artýdyń jóni joq. Kerisinshe, sportshylarymyzdy jigerlendirgen jón ǵoı. Demeýshiler Atyraý oblysynyń jurtshylyǵy atynan Ábıba Ábýjaqynova men Esmıgúl Kýıýlovaǵa kólik syılaýdy jón kórdi», deıdi R.Jumaǵazıev.

Dzıýdoshy Ábıba Ábýja­qynova qoldaý kórset­kenderge rızashylyǵyn bildirdi. О́zin Olımpıadaǵa daıyndaǵan bap­kerin de umytqan joq.

«Jyǵylǵanda janymnan tabylǵan janashyrlaryma al­ǵysym sheksiz. Bapkerim jeńiste de, jeńiliste de qasymnan tabylyp, meni bar qurmetke laıyq kórdi. Osyndaı qoldaýdan keıin meniń synýǵa, jeńilýge, nalýǵa jáne kúrespeýge quqyǵym joq dep oılaımyn. Men áli-aq jarq etemin», dedi Á.Ábýjaqynova.

Atyraý oblysy