Qazaqstan Bas prokýratýrasynyń jáne Ishki ister mınıstrliginiń Interpol qyzmetkerleri Qazaqstannyń Polsha Respýblıkasyndaǵy elshiliginiń kómegimen alkogoldik masań kúıde jol qozǵalysy erejelerin buzǵany úshin qylmystyq jaýapkershilikke tartý maqsatynda Polshadan Grýzııa azamatyn ekstradısııalady, dep habarlaıdy Egemen.kz Bas prokýratýranyń baspasóz qyzmetine silteme jasap.
Anyqtalǵandaı, kúdikti 2023 jyly Almaty qalasynda alkogoldik masań kúıde kólik júrgizip kele jatyp, qarsy jolaqqa shyǵyp ketken. Nátıjesinde basqa kólikpen soqtyǵysyp, júrgizýshiniń densaýlyǵyna aýyr zııan keltirgen. Qylmys jasaǵannan keıin kúdikti jasyrynyp, halyqaralyq izdeýge jarııalanǵan.
Bıylǵy jyldyń sáýir aıynda kúdikti Polshada ustalǵan. Qazaqstan Bas prokýratýrasynyń suraýy boıynsha kúdikti Qazaqstanǵa ekstradısııalanyp, qazir tergeý ızolıatoryna qamalǵan. Jasaǵan qylmysy úshin ol úsh jylǵa deıin bas bostandyǵynan aıyrylýy múmkin.
Aıta keteıik, Polsha Respýblıkasymen ekstradısııalaý týraly kelisimniń joqtyǵyna qaramastan, kúdiktini ekstradısııalaý Qazaqstannyń Bas prokýratýrasy men Polsha Ádilet mınıstrliginiń arasyndaǵy tyǵyz yntymaqtastyqtyń arqasynda múmkin bolǵan.
Eske sala keteıik, bıylǵy jyly Polsha tarapynan Qazaqstan aýmaǵynda asa iri kólemde esirtki bıznesimen aınalysqan transulttyq uıymdasqan toptyń uıymdastyrýshysy Qazaqstanǵa ekstradısııalandy.